Հայաստանը 74–րդ տեղն է զբաղեցնում 166 երկրների շրջանում ՏՀՏ զարգացմամբ և 9–րդ տեղը` գյուղերում 3G-ցանցով ծածկույթով

ԵՐԵՎԱՆ, 20 մարտի. /ԱՌԿԱ/. Ամբողջ աշխարհում ինտերնետից օգտվում է արդեն ավելի քան երեք միլիարդ մարդ, տեղեկատվական–հաղորդակցական տեխնոլոգիաների սրընթաց զարգացումը շարունակվում է աշխարհի գրեթե բոլոր երկրներում։ ՏՀՏ տեխնոլոգիաների զարգացման բոլոր միտումներն արտացոլված են Էլեկտրակապի միջազգային միության (ԷՄՄ) «Տեղեկատվական հասարակության չափում 2014» նոր զեկույցում, որը ներկայացնում է 166 երկրների ցուցանիշներ։

Երկրների վարկանիշը

ՏՀՏ զարգացմամբ առաջատար են Դանիան և Կորեայի Հանրապետությունը, իսկ ԱՊՀ երկրների թվում` Բելառուսը։ Որպես հիմք ընդունվել են այնպիսի ցուցանիշներ, ինչպիսիք են ՏՀՏ–ի հետ աշխատանքի համար բնակչության հմտությունները։ Առաջին 30 պետությունների թվում են եվրոպական երկրները և այլ տարածաշրջանների եկամուտների բարձր մակարդակ ունեցող երկրները, այդ թվում` Ավստրալիան, Բահրեյնը, Կանադան, Ճապոնիան, Չինաստանը (Մակաո), Նոր Զելանդիան, Սինգապուրը և Միացյալ Նահանգները։

ԱՊՀ երկրների շրջանում առաջատարը` Բելառուսը, զբաղեցնում է 38–րդ տեղն ընդհանուր ցուցակում, Ռուսաստանը` 42–րդում է, Ղազախստանը` 53–րդ տեղում։ Հայաստանը վարկանիշի 74–րդ տեղում է` թուլացնելով իր դիրքերը մեկ կետով նախորդ ուսումնասիրության համեմատ։

Տարածաշրջանային միջին ցուցանիշները վերջին 12 ամսվա ընթացքում առավելապես մեծացել են ԱՊՀ և արաբական երկրներում։ ՏՀՏ առավել դինամիկ զարգացում ունեցող երկրների թվում է, մասնավորապես, Վրաստանը։

Հայաստանը վարկանիշում

Թեև վարկանիշում Հայաստանի ցուցանիշները շատ չեն փոխվել, այդուհանդերձ, ինչպես կարծում է Հայաստանի հանրային ծառայությունները կարգավորող հանձնաժողովի հեռահաղորդակցությունների վարչության պետ Գևորգ Գևորգյանը, ընդհանուր առմամբ, հանրապետությունում 2014 թվականին պետք է նշել ոլորտի դինամիկ զարգացում։

Նա նշեց, որ հաշվետվությունում հրապարակած տվյալների համաձայն, Հայաստանը 9–րդ տեղն է զբաղեցնում աշխարհի 166 երկրների շրջանում գյուղական բնակավայրերը 3G բջջային ցանցով ծածկելու ցուցանիշով։

«Միաժամանակ, զեկույցի վերլուծության համաձայն, Հայաստանը լայնաշերտ բջջային ինտերնետի հասանելիության ամսական 4,88 դոլար սակագնով զբաղեցնում է 15–րդ տեղը 144 երկրների շարքում, իսկ ֆիքսված լայնաշերտ ինտերնետի ցուցանիշով` 21–րդ տեղը 165 երկրների թվում` ամսական միջին 10,99 դոլար սակագնով»,– ասաց Գևորգյանը։

Միաժամանակ, ըստ նրա, 2015 թվականի հունվարի 1–ի տվյալներով, միջազգային IP-տրաֆիկի ծառայությունների հոսքերի թողունակությունը կազմել է 88 հազար Մբիթ/վրկ, ինչը 14 տոկոսով ավելի է 2014 թվականի հունվարի 1–ի նույն ցուցանիշի համեմատ։ 

  

Միաժամանակ, զեկույցում հաշվի էր առնվում, որ միջազգային IP-տրաֆիկի ծառայությունների միջին սակագինը կազմել է 5200 դրամ (մոտ  $11), ինչը 32 տոկոսով ցածր է 2014 թվականի հունվարի 1–ի նույն ցուցանիշից։ 

Ինչ վերաբերում է Հայաստանում լայնաշերտ ինտերնետ օգտագործողների թվին, ապա, ինչպես հայտնեց Գևորգյանը, 2015 թվականի հունվարի 1–ի տվյալներով այդ ցուցանիշը հասել է 1,3 մլն–ի` մեկ տարում ավելանալով 10 տոկոսով։ Նրանցից 760917–ը բջջային հեռախոսներով 3G-ցանցին միացող բաժանորդներն են, 259665–ը` USB-մոդեմներով, 155008–ը` լարային xDSL տեխնոլոգիայով, 728 –ը` Wi-Max անլար տեխնոլոգիայով, 8562–ը` Wi-Fi անլար տեխնոլոգիայով։ Մոտ 95920 բաժանորդ միանում է օպտիկամանրաթելային ցանցով, 11981–ը` լարային Ethernet (ETTH) ցանցով, 343–ը` ռադիոմոդեմային ցանցով և նույնքան էլ` BPL (Broadband over Power Lines) տեխնոլոգիայով։   

  
«Հայաստանի կառավարության հաստատած` բաժանորդների թվի հաշվառման մեթոդիկայի համաձայն` Ինտերնետից օգտվողների թիվը երկրում կազմել է բնակչության ընդհանուր թվի 50,03%-ը` մեկ տարվա ընթացքում ավելանալով 9,4%-ով։ Կարծում եմ, որ ցանցերի նման զարգացման դեպքում Հայաստանը կկարողանա բարելավել իր դիրքերը վարկանիշում տարբեր ցուցանիշներով», - ասաց Գևորգյանը։  

Ընդհանուր միտումներ

ԷՄՄ զեկույցում ասվում է նաև, որ Ինտերնետ օգտագործողների թիվը 2014 թվականին, ընդհանուր առմամբ, աճել է 6,6%-ով` գերազանցելով երեք միլիարդ մարդ ցուցանիշը։ Վերջին հինգ տարվա ընթացքում զարգացող երկրներում Ինտերնետի հասանելիություն ունեցող մարդկանց թիվը կրկնապատկվել է, իսկ այս տարեվերջին տներից ինտեներտից օգտվելու հնարավորություն կունենա մոտ 44%-ն ամբողջ աշխարհում։

Անցյալ տարի տնից Ինտերնետին կարող էր միանալ 40% մարդ, այն դեպքում, երբ  2010 թվականին` ընդամենը 30%-ը։ Վերջին տասնամյակում զգալիորեն մեծացել է Ինտերնետի հասանելիությունը դպրոցներում։ Սակայն այսօրվա դրությամբ 4,3 միլիարդ մարդ դեռևս Ինտերնետ օգտագործելու հնարավորություն չունի։

ԷՄՄ–ի գլխավոր քարտուղար Համադուն Թուրեն նշում է, որ բջջային շարժական կապի պայմանագրերի թիվը 2014 թվականի ավարտին կհասնի յոթ միլիարդի, ինչը մոտավորապես հավասար է երկրագնդի բնակչության ընդհանուր թվին։ Բայց դա չի խոսում այն մասին, որ մոլորակի յուրաքանչյուր մարդ ունի բջջային հեռախոս։ Պարզապես բազմաթիվ օգտագործողներ աշխարհում ապրում են այնպիսի վայրերում, որտեղ բջջային կապը դեռ հասանելի չէ։

Հեղինակները նշում են, որ վերջին տարիներին աճում է այն մարդկանց թիվը, ովքեր կոնտենտ են ստեղծում, փոխանակում են այն և բեռնում են սոցցանցերի կայքեր։ Աշխարհում կոնտենտի հիմնական մատակարարը «հսկաների» խումբն է։ Այսպես, YouTube–ը դարձել է տեսաֆայլերի փոխանակման աշխարհի խոշորագույն ծառայություն, ծառայություններ է մատուցում 61 երկրում։ YouTube–ին բաժին է ընկնում ամեն ամիս ավելի քան մեկ միլիարդ այցելություն։ Վիքիպեդիան օնլայն առավել օգտագործվող հանրագիտարանն է։ Ներկայում այն ունի ավելի քան 30 հազար հոդված 287 լեզուներով։

Զեկույցում ասվում է, որ Ինտերնետ–կոնտենտի արտադրությունում գերակշռում են զարգացած երկրների ընկերություններ և բնակիչներ։ դոմենների գրանցված անվանումները զարգացած երկրներում 2013 թվականին կազմել են բոլոր նոր գրանցումների 80 տոկոսը։ -0-

Ծանոթացեք լուրերին առաջինն ու քննարկեք դրանք մեր Telegram-ում

12:47 20.03.2015