ՀՀ քաղաքացիները կարող են իրենց վարկային պատմությունը ստանալ Հայփոստի բաժանմունքների միջոցով
ԵՐԵՎԱՆ, 4 հոկտեմբերի. /ԱՌԿԱ/. Մեկնարկում է «Հայփոստ» ՓԲԸ–ի և «ԱՔՌԱ Քրեդիտ Ռեփորթինգ» ՓԲԸ–ի համատեղ ծրագիրը, որը թույլ է տալիս ֆիզիկական և իրավաբանական անձանց (վարկային տեղեկատվության սուբյեկտներին) պատվիրել և ստանալ իրենց վարկային պատմությունը (վարկային զեկույցը) Հայփոստի բաժանմունքների միջոցով, հաղորդում է Հայփոստի մամուլի ծառայությունը։
«Մինչ այժմ վարկային զեկույցի թղթային տարբերակը վարկային տեղակատվության սուբյեկտները կարող էին ստանալ միայն «ԱՔՌԱ Քրեդիտ Ռեփորթինգ» ՓԲԸ–ի գրասենյակում: Այժմ ՀՀ տարածքում գործող վարկային բյուրոյի՝ «ԱՔՌԱ Քրեդիտ Ռեփորթինգ» ՓԲԸ-ի և «Հայփոստ» ՓԲԸ-ի համագործակցության շնորհիվ՝ հաճախորդները, խնայելով ժամանակը, կարող են ստանալ իրենց վարկային զեկույցը «Հայփոստ» ՓԲԸ-ի մոտակա փոստային բաժանմունքում», – նշվում է հաղորդագրության մեջ։
Առաջիկա ամիսներին ծառայությունը հասանելի կլինի նաև ՀՀ «Հայփոստ» ՓԲԸ–ի բոլոր մարզային բաժանմունքներում: –0–
Ծանոթացեք լուրերին առաջինն ու քննարկեք դրանք մեր Telegram-ում
11:28 04.10.2016
