ԻՏՁՄ-ն շնորհակալագիր է հանձնել «ԱՌԿԱ» գործակալությանը` DigiTec-2016 ցուցահանդեսը լուսաբանելու համար

ԵՐԵՎԱՆ, 26 հոկտեմբերի. /ԱՌԿԱ/. Հայաստանի Ինֆորմացիոն տեխնոլոգիաների ձեռնարկությունների միությունը (ԻՏՁՄ) շնորհակալագիր է հանձնել «ԱՌԿԱ» լրատվական գործակալությանը` DigiTec-2016 ցուցահանդեսը պրոֆեսիոնալ լուսաբանելու համար:

Ինչպես նշվում է շնորհակալագրի մեջ, այն տրվում է ՏՀՏ ոլորտի հիմնախնդիրներին անդռադառնալու և DigiTec-2016-ը պրոֆեսիոնալ ու բարձր մակարդակով լուսաբանելու համար:

DigiTec-2016 ամենամյա միջազգային 12–րդ տեխնոլոգիական ցուցահանդեսը տեղի է ունեցել Երևանում սեպտեմբերի 30-ից հոկտեմբերի 2-ը` «Տոն տեխնոլոգիակայն հայության համար»: Ցուցահանդեսին իրենց նորարարական որոշումներն են ներկայացրել ավելի քան 120 խոշոր տեխնոլոգիական ընկերություններ: Ցուցահանդեսն անցկացվել է հանրապետության կառավարության հովանու ներքո: Ցուցահանդեսի պլատինե հովանավորն է կապի միասնական օպերատոր Ucom ընկերությունը:

«ԱՌԿԱ» լրատվական գործակալությունը, որը մասնագիտանում է ֆինանսատնտեսական տեղեկատվության բնագավառում, գործում է 1996թ. մայիսի 1-ից։ Այսօր «ԱՌԿԱ» մեդիահոլդինգի կազմում մտնում են նաև հեռահաղորդակցական և բարձր տեխնոլոգիների teleсom.arka.am և ֆինանսաբանկային armbanks.am պորտալները: 

«ԱՌԿԱ»-ի տեղեկատվության աղբյուրները հայկական պետական կառույցներն են, հեղինակավոր բանկերը և ընկերությունները, միջազգային և օտարերկրյա կազմակերպությունների ներկայացուցչությունները: 

Գործակալության տեղեկատվությունը պարբերաբար ստանում և օգտագործում են տարբեր կազմակերպություններ, այդ թվում՝ պետական և կոմերցիոն կառույցներ, բանկեր, միջազգային ֆինանսական կազմակերպություններ, խորհրդատվական ընկերություններ, դեսպանատներ, զանգվածային լրատվամիջոցներ։ 

Այսօր գործակալության հաճախորդների թվում են Հայաստանի կառավարությունը, ՀՀ Կենտրոնական բանկը, Համաշխարհային բանկը, ԱՄՀ-ն, IFC-ը և այլք: 

Գործակալության հետ համագործակցում են համաշխարհային և ռուսական խոշորագույն տեղեկատվական գործակալությունները, մասնավորապես՝ Factiva-ն, ISI-ը, Thomson Reuters-ը, Ինտերֆակսը, Ռոսբիզնեսկոնսալթինգը և մյուսները: 

2000թ. արդյունքներով՝ «ԱՌԿԱ» գործակալությունը ՀՀ Կենտրոնական բանկի կողմից ճանաչվել է Հայաստանի լավագույն տնտեսական գործակալություն: 

2002-2003թթ. Business Initiative Directions կազմակերպությունը «ԱՌԿԱ» գործակալությանը արժանացրեց Որակի համար Միջազգային Աստղ (International Star Award for Quality) մրցանակով՝ Gold կատեգորիայում։ 

2011թ.-ին «ԱՌԿԱ» գործակալությունը ներկայացվել է «Best Enterprises» («Լավագույն ձեռնարկություններ») միջազգային հեղինակավոր պարգևի՝ Հայաստանում 15 տարվա գործունեության ընթացքում զարգացման դինամիկայի և տրամադրվող ծառայությունների բարձր մակարդակի համար: -0-

 

Ծանոթացեք լուրերին առաջինն ու քննարկեք դրանք մեր Telegram-ում

17:11 26.10.2016