Նոր iPhone–ներն ապակե կորպուս և անլար լիցքավորում կունենան

ԵՐԵՎԱՆ, 24 նոյեմբերի. /ԱՌԿԱ/. KGI Securities ընկերության վերլուծաբան Մինգ Չի Կուոն, ով հայտնի է Apple–ի սարքերի մասին բավականին ճշգրիտ կանխատեսումներով, կարծում է, որ նոր iPhone–ները կունենան անլար լիցքավորման հնարավորություն, ինչպես նաև այդ տեխնոլոգիայի աշխատանքի բարելավման համար դրանց կորպուսներն ապակե կլինեն, գրում է newsru.com–ը` հղում անելով  MacRumors–ին։ 

Կուոյի այդ կանխատեսումը հաստատում է ավելի վաղ հայտնված այն տեղեկությունը, թե Apple–ի գործընկերները ներկայում թեստավորում են ապագա iPhone 8–ի անլար լիցքավորման մոդուլներ, սակայն Կուոյի կարծիքով, այդ մոդուլների մատակարարման բացառիկ մատակարար կդառնա ոչ թե Foxconn–ը, ինչպես հաղորդվում էր ավելի վաղ, այլ Pegatron–ը։

Ինչ վերաբերում է iPhone–ի մետաղական կորպուսից անցումն ապակե կորպուսի, ապա այդ քայլը վերլուծաբանը բացատրում է դիզայներների ցանկությամբ և այն փաստով, որ այդպիսի կորպուսը կապահովի անլար լիցքավորման ավելի արդյունավետ աշխատանք։

Կուոն միաժամանակ վստահ չէ, թե արդյոք անլար լիցքավորման տեխնոլոգիան հասանելի կլինի այս տարի ընկերության կողմից ներկայացվելիք iPhone–ների բոլոր մոդելների համար։ 

Հիշեցնենք, որ ավելի վաղ աղբյուրները կանխատեսում են iPhone 8–ի երեք տարբերակներ` 4,7, 5, և 5,5 դյույմ անկյունագծով։ Ըստ պտտվող լուրերի, բոլոր երեք մոդիֆիկացիաները կունենան ապակե պանելներ, իսկ սմարթֆոնի ավագ տարբերակը կունենա նաև կեռ OLED-էկրան։ 

2017 թվականին կլրանա առաջին սերնդի iPhone–ի թողարկման տասը տարին, այդ իսկ պատճառով շատերը սպասում են, որ Apple–ը կնորացնի իր սմարթֆոնների արտաքին տեսքը։ -0-

 

Ծանոթացեք լուրերին առաջինն ու քննարկեք դրանք մեր Telegram-ում

14:45 24.11.2016