ԻՆՏԵՐՆԵՏՆ ՈՒ ՈՐԱԿՅԱԼ ԿԱԴՐԵՐԻ ՊԱՀԱՆՋԱՐԿԸ ՀԱՅԱՍՏԱՆՈՒՄ SYNOPSYS-Ի ՀԻՄՆԱԿԱՆ ԽՆԴԻՐՆԵՐՆ ԵՆ. ԳՈԼԴՄԱՆ
ԵՐԵՎԱՆ, 28 հոկտեմբերի. /ԱՌԿԱ/. Synopsys ընկերությունն այսօր Հայաստանում պետք է լուծի երկու խնդիր, որոնք կապված են ինտերնետի և որակյալ կադրերի որոնման հետ, հինգշաբթի լրագրողներին ասաց Synopsys Inc.-ի շուկայի ռազմավարական զարգացման գծով փոխնախագահ, «Synopsys Armenia» ընկերության գլխավոր տնօրեն Ռիչ Գոլդմանը:
«Հայաստանում ինտերնետը լավանում է, այժմ այն ավելի լավ վիճակում է, սակայն մասնագետները շեշտը դնում են լոկալ ինտերնետի զարգացման վրա, իսկ Հայաստանում մեր ողջ արտադրանքը նախատեսված է արտահանման համար, այդ պատճառով առաջին հերթին որակյալ ելնող ինտերնետ է հարկավոր», - նշեց Գոլդմանը:
Խոսելով կադրերի որոնման մասին՝ Գոլդմանը նշեց, որ այս տարի աշխատանքի է ընդունվել 40 նոր աշխատակից, ևս 60 աշխատակից է եկել Virage Logic ընկերությունից, սակայն այժմ Synopsys Armenia-ն 40 թափուր տեղ ունի ինժեներների համար:
Նա նաև ասաց, որ ընկերությունը կցանկանար հաճախորդներ ունենալ նաև հայկական շուկայում և հույս հայտնեց, որ բարձր-տեխնոլոգիական ընկերություններն ու ուսումնական հաստատությունները Հայաստանում ընկերության արտադրանքի պահանջարկ կսստեղծեն:
Synopsys Inc. ընկերությունը հայկական շուկա է մտել 2004 հոկտեմբերին՝ Leda Design և Monterey Arset-ի՝ մեկ միասնական Synopsys Armenia ԲԲԸ-ում միավորվելու մասին պայմանագրի ստորագրումից հետո։ Մինչև տարեվերջ Synopsys-ը նախատեսում է ավարտել 315 միլիոն դոլարով Virage Logic կորպորացիայի բաժնետոմսերի ձեռքբերման գործարքը, ինչից հետո ընկերություններն ամբողջովին կինտեգրեն մշակումներն ու կորոշեն Virage Logic-ի ապրանքանիշի, աշխատատեղերի և գրասենյակային տարածքների հետ կապված հարցերը:
«Synopsys»-ն իր գրասենյակներն ունի աշխարհի 60 երկրում, Հյուսիսային Ամերիկայում, Եվրոպայում, Ճապոնիայում և Ասիայում, իսկ գլխավոր գրասենյակը գտնվում է Կալիֆոռնիայում (ԱՄՆ)։--0—
Ծանոթացեք լուրերին առաջինն ու քննարկեք դրանք մեր Telegram-ում
01:09 29.10.2010