ՀԱՅԱՍՏԱՆՈՒՄ SYNOPSYS-Ի ՏԱՐԵԿԱՆ ՆԵՐԴՐՈՒՄՆԵՐԸ ԳԵՐԱԶԱՆՑՈՒՄ ԵՆ 10 ՄԻԼԻՈՆ ԴՈԼԱՐԸ

ԵՐԵՎԱՆ, 28 հոկտեմբերի. /ԱՌԿԱ/. Հայաստանում Synopsys-ի տարեկան ներդրումները գերազանցում են 10 միլիոն դոլարը, հինգշաբթի լրագրողներին տեղեկացրեց Synopsys Inc.-ի շուկայի ռազմավարական զարգացման գծով փոխնախագահ, «Synopsys Armenia» ընկերության գլխավոր տնօրեն Ռիչ Գոլդմանը:
«Մենք մեծ ներդրումներ ենք կատարում նաև Հայաստանի համալսարաներում և նրանց գործիքներ ենք նվիրում», - ասաց Գոլդմանը:
Նա նաև տեղեկացրեց, որ «Synopsys» ընկերությունը մտադիր է նույն տեմպով շարունակել իր համագործակցությունը Հայաստանի հետ և իր ապրանքների արտադրության համար հույսը դնում է հայ ինժեներների մտավոր ներուժի վրա:
«Synopsys» ընկերության գլխավոր-գործադիր տնօրեն Չի-Ֆուն Չանն իր հերթին նշեց, որ ընկերության մտավոր ներուժի զգալի մասը Հայաստանում է, քանի որ 6,5 հազար աշխատակիցներից շուրջ տասը տոկոսը Հայաստանում է:

Չանը նաև նշեց, որ ընկերությունն ունի մի շարք կարևոր արտադրական ուղղվածություններ, որոնք նախատեսում է ստեղծել հենց Հայաստանում:

«Հաշվի առնելով վերջին տարիների ընթացքում երկրի զարգացումը՝ մենք արդեն կարող ենք խորհուրդ տալ մեր գործընկերներին այցելել Հայաստան և այստեղ ՏՏ-կենտրոններ հիմնել», - ավելացրեց նա:

Synopsys Inc. ընկերությունը հայկական շուկա է մտել 2004 հոկտեմբերին՝ Leda Design և Monterey Arset-ի՝  մեկ միասնական Synopsys Armenia ԲԲԸ-ում միավորվելու մասին պայմանագրի ստորագրումից հետո։ Մինչև տարեվերջ Synopsys-ը նախատեսում է ավարտել 315 միլիոն դոլարով Virage Logic կորպորացիայի բաժնետոմսերի ձեռքբերման գործարքը, ինչից հետո ընկերություններն ամբողջովին կինտեգրեն մշակումներն ու կորոշեն Virage Logic-ի ապրանքանիշի, աշխատատեղերի և գրասենյակային տարածքների հետ կապված հարցերը:

«Synopsys»-ն իր գրասենյակներն ունի աշխարհի 60 երկրում, Հյուսիսային Ամերիկայում, Եվրոպայում, Ճապոնիայում և Ասիայում, իսկ գլխավոր գրասենյակը գտնվում է Կալիֆոռնիայում (ԱՄՆ)։--0—

Ծանոթացեք լուրերին առաջինն ու քննարկեք դրանք մեր Telegram-ում

01:35 29.10.2010