E-COMMERCE-Ի ՀԱՐՑԵՐԸ ԿՔՆՆԱՐԿՎԵՆ ՏՀՏ ՈԼՈՐՏԻ ՂԵԿԱՎԱՐՆԵՐԻ ՀԵՏ ԱՌԱՆՑ ՓՈՂԿԱՊԻ ՀԱՆԴԻՊՄԱՆ ԺԱՄԱՆԱԿ
ԵՐԵՎԱՆ, 14 դեկտեմբերի. /ԱՌԿԱ/. Դեկտեմբերի 17-19-ը «Աղվերան» հանգստյան տանը կանցկացվի «ՏՀՏ ԼԻԴԵՐՆԵՐԻ ՀԱՆԴԻՊՈՒՄ» ֆորումը, երեքշաբթի «ԱՌԿԱ» գործակալությանը հաղորդեցին Ինֆորմացիոն Տեխնոլոգիաների ձեռնարկությունների միությունից (UITE)։
Հանդիպումը նվիրված է Հայաստանի էլեկտրոնային առևտրի (E-commerce) հարցերին։ Մասնավորապես ֆորումի օրակարգում ընդգրկված են Կենտրոնական բանկի կողմից կիրառվող էլեկտրոնային առևտրի (E-commerce) կարգավորման մեխանիզմները, ԱրՔա էլեկտրոնային վճարային համակարգի տեսլականը՝ Հայաստանում էլեկտրոնային առևտրի զարգացման վերաբերյալ։
Համաժողովի մասնակիցները կքննարկեն էլեկտրոնային կառավարման (E-gov) ոլորտում առկա էլեկտրոնային վճարումների խնդիրները, էլեկտրոնային առևտրում առկա էլեկտրոնային վճարումների խնդիրները, էլեկտրոնային առևտրի զարգացման հնարավոր մոդելների սկզբունքները, որոնք կարող են կիրառվել Հայաստանում։
Ծրագրվում է, որ էլեկտրոնային առևտրի ոլորտի միջազգային փորձը կներկայացնեն Ռուսաստանի, Վրաստանի և Մակեդոնիայի փորձագետները։
Ֆորումին մասնակիցներն են՝ ՀՀ էկոնոմիկայի նախարար Ներսես Երիցյանը, Կենտրոնական և առևտրային բանկերի ներկայացուցիչներ, ինչպես նաև բիզնեսի այլ ուղղությունների և ոլորտի ավելի քան 50 տեղական և արտասահմանյան ընկերություններ։
Ծրագրվում է, որ ֆորումի արդյունքներն անձամբ կամփոփի ՀՀ վարչապետ Տիգրան Սարգսյանը։
Ֆորումի կազմակերպիչն է Ինֆորմացիոն Տեխնոլոգիաների ձեռնարկությունների միությունը (ԻՏՁՄ)՝ կառավարության և «Մրցունակ մասնավոր հատված» (CAPS) ծրագրի աջակցությամբ։
Միության կողմից հանդիպումներն անցկացվում են տարեկան մի քանի անգամ՝ տվյալ բնագավառի համար առավել արդիական թեմաների և համատեղ քայլերի մշակման, ինչպես նաև կառավարության առաջարկների նպատակով։
«Առանց փողկապի հանդիպում» ֆորումում ավանդաբար մասնակցում են ինչպես Հայաստանի խոշոր և միջին ՏՏ-բիզնեսի ներկայացուցիչներ, այնպես էլ պետական կառույցներ։ -0-
Ծանոթացեք լուրերին առաջինն ու քննարկեք դրանք մեր Telegram-ում
00:41 15.12.2010