ՏՏ-ձեռնարկությունների զարգացումն ու տեխնիկական կրթության ոլորտը կդառնան 2011 թ.-ին UITE-ի գործունեության առաջնահերթությունները

ԵՐԵՎԱՆ, 11 հունվարի. /ԱՌԿԱ/. ՏՏ-ձեռնարկությունների զարգացումն ու տեխնիկական կրթության ոլորտը կդառնան 2011 թ.-ին Տեղեկատվական տեխնոլոգիաների ձեռնարկությունների միության (UITE) գործունեության առաջնահերթությունները, ասել է միության գործադիր տնօրեն Կարեն Վարդանյանը:

«2011թ. ուշադրության կենտրոնում կլինեն նաև տեխնիկական ձեռներեցության զարգացումն ու առցանց կրթական միավորների ստեղծումը, որպեսզի շրջաններում նույնպես հնարավորություն լինի մասնակցել ոլորտի կրթական գործընթացներին», - մեջբերեցին Վարդանյանի խոսքերը UITE-ի մամուլի ծառայությունից:

Ամփոփելով անցած տարվա արդյունքները՝ նա նշեց, որ 2010 թվականը բավական հագեցած էր ՏՏ իրադարձություններով, որոնք մեծապես նպաստեցին ոլորտի զարգացմանը: Նրանց թվում Վարդանյանը նշեց 6-րդ ամենամյա Digitec Expo ցուցահանդեսի անցկացումը, որի այցելուների թիվը ավելացել է 30 տոկոսով և կազմել 16 հազար, իսկ 2011 թ.-ին ակնկալվում է ունենալ 20 հազ. այցելու:

Նա նաև նշեց, որ 2010-ի ընթացքում կազմակերպվեցին արդեն ավանդական դարձած ՏՀՏ լիդերների հանդիպումներ, որոնց ընթացքում քննարկվեցին ՏՀՏ ոլորտի կրթության, էլեկտրոնային առևտրի և այլ խնդիրներ:

Վարդանյանի խոսքերով՝ հաջողություններ է գրանցել նաև Հայաստանի Ռոբոտների բաց առաջնությունը (ArmRobotx), որի շրջանակներում անցկացվեց բավական բարդ` ական փնտրող ռոբոտի մրցույթ, իսկ 2011-ին նախատեսվում է կազմակերպել անօդաչու ինքնաթիռների մրցույթ: Բացի այդ` հոկտեմբերի վերջին ստեղծվեց «ԱրմՌոբոտիքս» ակումբը:

Հայաստանի տեղեկատվական տեխնոլոգիաների ձեռնարկությունների միությունը (UITE) հիմնադրվել է 2000 թ.-ին՝ նպատակ ունենալով պաշտպանել այդ ոլորտի ընկերությունների տնտեսական շահերը, խթանել բիզնեսի զարգացումը, խրախուսել ՏՏ-ոլորտում իրականացվող հետազոտությունները: Այժմ միության մեջ ներառված է Հայաստանի բարձր և տեղեկատվական տեխնոլոգիաների ոլորտը ներկայացնող ավելի քան 50 ընկերություն:-0-

Ծանոթացեք լուրերին առաջինն ու քննարկեք դրանք մեր Telegram-ում

21:43 11.01.2011