Հայաստանը մտադիր է տեղական շուկա ներգրավել Intel և Hewlett-Packard ընկերություններին
ԵՐԵՎԱՆ, 1 հոկտեմբերի. /ԱՌԿԱ/. Հայաստանը մտադիր է տեղական շուկա ներգրավել Intel և Hewlett-Packard (HP) ընկերություններին։ Այս մասին «ԱՌԿԱ» գործակալությանը տեղեկացրեց «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը։
Նրա խոսքերով, Հայաստանի կառավարությունը հետևողական աշխատանք է իրականացնում՝ հայկական շուկայում միջազգային ընկերությունների ներկայացվածության աճի ուղղությամբ, ինչը նախատեսվում է նաև տեղեկատվական տեխնոլոգիաների զարգացման հայեցակարագում։
«Արդեն աշխատանքներ են տարվում՝ Հայաստան Intel և HP ընկերությունների ներգրավման ուղղությամբ՝ ոչ միայն հայկական շուկայում վաճառքի ապահովման, այլև ծրագրային ապահովման մշակման և տարբեր ապրանքների մշակման հնարավոր կենտրոնների ստեղծման տեսակետից», - ասել է Ենգիբարյանը։
Միաժանակ նա նշել է, որ արդեն հայկական շուկայում ներկայացված են խոշոր կորպորացիաները, մասնավորապես, Microsoft-ը, Sun Microsystems-ն ու National Instruments-ն աշխատանքներ են իրականացնում Հայաստանում սեփական գործունեության ընդլայնման ուղղությամբ՝ աստիճանաբար անցում կատարելով վաճառքի կազմակերպումից դեպի ապրանքների մշակման և հետազոտությունների անցկացման գործունեություն։
Հայաստանում Microsoft-ի ներկայացուցչության տնօրեն Գրիգոր Բարսեղյանն այս կապակցությամբ նշել է, որ Microsoft-ի մուտքը յուրաքնաչյուր երկրի շուկա խթանում է նաև այլ ընկերությունների, ինչպես մրցակիցների, այնպես էլ գործընկերների ներգրավմանը։
«Ձեռնարկությունների ինկուբատոր» հիմնադրամի հետազոտությունների համաձայն, Հայաստանի տեղեկատվական տեխնոլոգիաների բնագավառում գործող ընկերությունների շրջանառությունը 2008 թ.-ին գերազանցել է 100 մլն դոլարը։ Հաշվետու ժամանակաշրջանում երկրում գործել է 120 ընկերություն, որոնք ապահովել են բնագավառի 15 տոկոս կայուն աճը։ Բնագավառում ներգրավված են 6 հազար նեղ մասնագետներ, ինչպես նաև 8 հազար մարդ՝ օժանդակ անձնակազմում։-0-
Ծանոթացեք լուրերին առաջինն ու քննարկեք դրանք մեր Telegram-ում
21:37 01.10.2008