ՀԱՆՈՒՆ «ՇՓՄԱՆ ԿՈՒԼՏՈՒՐԱՅԻ» ԲԱՐՁՐԱՑՄԱՆ
ԵՐԵՎԱՆ, 11 փետրվարի. /ԱՌԿԱ/. Նախօրեին «Վկոնտակտե» սոցիալական ցանցում ներդրված փակ գրանցումը մասնակիցների «շփման կուլտուրան» բարձրացնելու նպատակ ունի, տեղեկացնում է ընկերության մամուլի ծառայության ղեկավար Վլադիսլավ Ցիպլուխինի կայքը, հաղորդում է ՌԻԱ Նովոստին:
Սկսած ուրբաթից՝ «Վկոնտակտե»-ի նոր օգտատերերը կարող են գրանցվել միայն սահմանափակ թվով անձանց հրավերով, ովքեր արդեն սոցիալական ցանցի անդամներ են: Ցիպլուխինը խոստացել է ավելի ուշ հայտնել, թե ով իրավունք կունենա բաժանել հրավերները:
«Մենք հավատում ենք փակ ցանցերին: Շփման որակն ու կուլտուրան մեզ համար ավելի կարևոր է, քան օգտատերերի թիվը: Մենք նպատակ չունենք կայքը հասցնել 6 միլիարդ հոգու, մեր նպատակը հաղորդակցման կատարյալ միջոց ստեղծելն է»,- հայտնում է «Վկոնտակտե» ցանցի աշխատակազմը:
Սոցիալական ցանցի ղեկավարությունը պարզաբանել է, որ ռոբոտների կողմից տարածվող սպամի դեմ պայքարն օգտագործողների բաց գրանցումից հրաժարվելու միակ պատճառը չէ: -0-
Ծանոթացեք լուրերին առաջինն ու քննարկեք դրանք մեր Telegram-ում
23:59 11.02.2011