ՀԱՅԿԱԿԱՆ ՅՈՒՆԻԲԱՆԿԸ ԳՈՐԾԱՐԿԵԼ Է ԲԱՆԿԻ ԿԱՅՔԻ WAP-ՏԱՐԲԵՐԱԿԸ

Ինչպես «ԱՌԿԱ» գործակալությանը տեղեկացրեցին բանկի հասարակայնության հետ կապերի ծառայությունից, ինտերնետից օգտվողները հնարավորություն ունեն ամենուրեք, որտեղ հասանելի է բջջային կապը, բջջային հեռախոսների միջոցով օպերատիվ կերպով տեղեկատվություն ստանալ բանկի ծառայությունների և ապրանքների մասին, ծանոթանալ նորություններին և տարադրամի փոխարժեքին։

«Կայքի WAP-տարբերակում կա նաև բանկի «թեժ գծի» հեռախոսահամարը (85-80)», - նշվում է տեղեկատվության մեջ։
«Յունիբանկի» կայքի wap-տարբերակի հասցեն է՝ wap.unibank.am։

WAP-ը (Wireless Application Protocol) պրոտոկոլ կամ տեխնիկական չափորոշիչ է, որը նկարագրում է միջոցը, որի օգնությամբ տեղեկատվությունը Ինտերնետից փոխանցվում է բջջային հեռախոսի էկրանի վրա։ Փաստորեն Wap-կայքը Web-կայքի պարզեցված տարբերակն է և ստեղծված է հատուկ բջջային հեռախոսով դիտելու համար։

WAP կայքերի էջերը գրված է WML լեզվով, և դրանք կարելի է դիտել WAP բրաուզեր ունեցող յուրաքանչյուր հեռախոսով։
«Յունիբանկ» ՓԲԸ-ն ստեղծվել է 2001 թ.-ին։ Այժմ բանկի բաժնետերերն են «Յունիաստրում Ասսետ Մենեջմենտ» ԲԲԸ-ն՝ 50 տոկոս մասնաբաժնով, մնացած 50 տոկոսը պատկանում է ռեզիդենտ ընկերություն «Էվաինվեստ» ԲԲԸ-ին։

«ԱՌԿԱ» գործակալության տվյալներով, 2008 թ.-ի չորրորդ եռամսյակի տվյալներով, բանկի ակտիվները կազմում են 68,8 մլրդ դրամ, ընդհանուր կապիտալը՝ 9,5 մլրդ դրամ, 2008 թ.-ի մաքուր եկամուտը 1,8 մլրդ դրամ է։ (1 դոլարը 305,45 դրամ է)։-0-

Ծանոթացեք լուրերին առաջինն ու քննարկեք դրանք մեր Telegram-ում

20:37 23.01.2009