FiberNet Communication ընկերությունը չի մեղադրում մրցակիցներին տարանցիկ ինտերնետ-մալուխը վնասելու մեջ
ԵՐԵՎԱՆ, 23 մայիսի. /ԱՌԿԱ/. FiberNet Communication ընկերությունը հանդես է եկել հայտարարությամբ՝ ի պատասխան ընկերության մալուխը վնասելու մասին որոշ լրատվամիջոցների կողմից տարածած տեղեկատվության, որում չի մեղադրում իր մրցակիցներին:
«Հակառակ տարածված կարծիքի այն մասին, որ սա մրցակիցների կողմից կատարված գործողություն է, մենք հակված չենք այդպես մտածել: Կցանկանայինք նշել, որ չնայած շուկայում տեղ գտած բավական լուրջ մրցակցությանը՝ մենք կարողանում ենք պահմանել մեր մրցակիցների հետ առողջ հարաբերությունների մթնոլորտը», - նշվում է ընկերության տեղեկատվության մեջ:
Ուրբաթ՝ մայիսի 20-ին, ժամը 15:50-ի սահմաններում ամբողջությամբ խափանվել է կապը «Ֆայբերնետ» ընկերության ցանցի և ինտերնետ հասանելիություն մատակարարող բոլոր այլ միջազգային ցանցերի միջև: FiberNet Communicationն ընկերությունը մալուխը վարձակալում է «Հարավկովկասյան Երկաթուղի» ՓԲԸ-ից:
«Դեպքի վայր են ժամանել ինչպես մեր ընկերության, այնպես էլ «Հարավկովկասյան Երկաթուղի» ՓԲԸ աշխատակիցները և հայտնաբերել են մալուխի վնասված հատվածը: Պարզվել է, որ վնասված հատվածում կտրված է ինչպես առաջին արտաքին պաշտպանիչ խողովակը, այնպես էլ երկրորդ պաշտպանիչ խողովակը և ինքը՝ մալուխը», - նշվում է տեղեկատվության մեջ:
Ընկերությունում հակված են ենթադրել, որ խողովակները և մալուխը կտրվել են սղոցող գործիքի օգնությամբ: «Ֆայբերնետ» և «Հարավկովկասյան Երկաթուղի» ընկերությունների աշխատակիցների օպերատիվ և համաձայնեցված գործողությունների շնորհիվ մալուխի վնասված հատվածը վերականգնվել է հնարավորինս սեղմ ժամկետներում
«Իրավիճակին համապատասխան՝ «ՀԿԵ» ՓԲԸ աշխատակիցների կողմից կազմվել է տեղի ունեցածի վերաբերյալ ակտ և տարվում է հետաքննություն: Մենք կարծում ենք, որ հետաքննությունն ավարտվելուց հետո «ՀԿԵ» ՓԲԸ ներկայացուցիչները կկարողանան տրամադրել մանրամասն տեղեկատվություն», - նշվում է ընկերության տեղեկատվության մեջ:
Ընկերությունը հաղորդում է, որ մտադիր է ձեռք բերել պահուստային թողունակություններ ՀՀ տարածքում՝ նման իրավիճակներից խուսափելու նպատակով:
«Կցանկանայինք նաև նշել, որ վերջերս մեր ընկերությունը մի շարք լուրջ քայլեր է ձեռնարկել ՀՀ տարածքից դուրս գտնվող կապուղիների պահուստայնությունն ապահովելու և որակական չափանիշները լավացնելու ուղությամբ, որոնց մասին առավել մանրամասն կմեկնաբանենք մոտակա օրերին», - նշվում է ընկերության տեղեկատվության մեջ:-0-
Ծանոթացեք լուրերին առաջինն ու քննարկեք դրանք մեր Telegram-ում
20:02 23.05.2011
