Huawei technologies չինական կորպորացիան մտադիր է ընդլայնել իր գործունեությունը Հայաստանում

ԵՐԵՎԱՆ, 24 օգոստոսի./ԱՌԿԱ/. Huawei technologies Co. Ltd չինական հեռահաղորդակցական կորպորացիան մտադիր է ընդլայնել իր գործունեությունը Հայաստանում, տեղեկացրեց կորպորացիայի առաջին փոխնախագահ Գո Տիանմինը (Guo Tianmin) ՀՀ փոխվարչապետ, տարածքային կառավարման նախարար Արմեն Գևորգյանի հետ հանդիպման ընթացքում:

Հանդիպումը տեղի է ունեցել երեքշաբթի Շենժեն քաղաքում գտնվող «Huawei technologies»-ի կենտրոնական գրասենյակում:
Ինչպես հաղորդում է ՀՀ տարածքային կառավարման նախարարության մամուլի ծառայությունը, զրուցակիցները քննարկեցին գործակցության ուղղությունները: Մասնավորապես, անդրադարձ եղավ Հայաստանում ինովացիոն, ծրագրերի ստեղծման և մշակման կենտրոններ հիմնելու, Երևանի քաղաքապետարանի հետ ծրագրեր իրականացնելու հնարավորություններին:

Այս պահին Huawei technologies-ը Հայաստանում համագործակցում է «Vivacell-MTS» բջջային օպերատորի հետ` ծրագրելով խորացնել փոխգործակցությունը:

Գևորգյանն իր կողմից ողջունել է ընկերության մտադրությունները և պատրաստակամություն է հայտնել աջակցել նոր նախաձեռնություններին:
Huawei technologies Co. Ltd կորպորացիան աշխարհում հեռահաղորդակցության ոլորտի առաջատարներից է, մասնագիտացած է ոլորտի մի շարք ճյուղերում` սարքավորումների արտադրություն, էլեկտրոնային կառավարում, հեռահաղորդակցական համակարգեր և այլն: Այն լայն գործունեություն է ծավալում ԱՊՀ մի շարք երկրներում և արդեն մեկ տարի է, ինչ ներկայացուցչություն ունի նաև Հայաստանում:-0-

Ծանոթացեք լուրերին առաջինն ու քննարկեք դրանք մեր Telegram-ում

20:10 24.08.2011