Հայաստանում օղակաձև արագացուցիչի կառուցումը կսկսվի 2012 թ.-ի կեսին
ԵՐԵՎԱՆ, 24 հոկտեմբերի. /ԱՌԿԱ/. CANDLE (Center for the Advancement of Natural Discoveries using Light Emission) նախագծի շրջանակներում օղակաձի արագացուցիչի կառուցումը, որն արժե 60 մլն եվրո, կսկսվի 2012 թ.-ի կեսին, երկուշաբթի լրագրողներին ասաց ՀՀ ԿԳ նախարարության Գիտության պետական կոմիտեի նախագահ Սամվել Հարությունյանը:
Նրա խոսքերով՝ սպասվում է, որ համապատասխան ֆինանսավորման դեպքում հիմնական օղակաձև արագացուցիչի կառուցումը կավարտվի 2016 թ.-ին:
«Հայաստանում արդեն սկսվել են արագացուցիչի հետ կապված AREAL գծային արագացուցիչի կառուցման աշխատանքները, որոնք նախատեսվում է ավարտել 2012 թ.-ի վերջին: Այն նախատեսվում է շահագործման հանձնել արդեն 2013 թ.-ի գարնանը», - ասաց Հարությունյանը:
Նա նշեց, որ օղակաձև արագացուցիչի կառուցման նախագծի ընդհանուր արժեքը, որն իրականացվելու է DESY գերմանական էլեկտրոնային սինքրոտրոնի նմանությամբ, կազմում է 5 մլն եվրո, որից գերմանական կողմի հետ համագործակցության շրջանակներում արդեն տրամադրվել է 3 մլն եվրոյի սարքավորում:
Ինչպես տեղեկացրեց կոմիտեի ղեկավարը, նախագծի շրջանակներում համագործակցություն է հաստատվել Գերմանիայի, Շվեյցարիայի և Ռուսաստանի համապատասխան տեխնիկական ինստիտուտների հետ, ինչը թույլ կտա համապատասխան կադրեր նախապատրաստել:
«Արագացուցիչի գործարկումը թույլ կտա Հայաստանին իրականացնել ոչ միայն սինքրոտրոնային ուսումնասիրություններ, այլև առանձին գիտական աշխատանքներ, որոնք թույլ կտան էականորեն խթանել երկրում բնական գիտությունների զարգացումը», - ասաց Հարությունյանը:
«ՔԵՆԴԼ»-ը (CANDLE-Center for the Advancement of Natural Discoveries using Light Emission) Հայաստանում 3 ԳէՎ էներգիայով 3-րդ սերնդի սինքրոտրոնային լույսի աղբյուրի նախագիծ է, որը հնարավորություն կստեղծի ժամանակակից հիմնարար և կիրառական հետազոտություններ կատարել կյանքի գիտությունների, նյութագիտության և շրջակա միջավայրի ուսումնասիրության բնագավառներում:
Փորձագետների տվյալների համաձայն՝ այդ արագացուցիչի արժեքը գնահատվում է մոտավորապես 100 միլիոն դոլար: Պետությունը պատրաստ է ֆինանսավորել նախագծի արժեքի 25 տոկոսը:
CANDLE նախագիծը ճառագայթման աղբյուր է երրորդ սերնդի արագացնող-կուտակիչ համալիրի հիման վրա 2 մլրդ էլեկտրոնվոլտ էլեկտրոնների էներգիայով: Համալիրը թույլ է տալիս ալիքների երկարության լայն դիապազոնում՝ ուլտրամանուշակագույնից մինչև ռենտգեն, հզոր բացառիկ լուսային հոսքի ավելի քան 60 ալիք ունենալ:
Ներկայումս աշխարհում գործում են լույսի ավելի քան 40 աղբյուրներ, որոնք հիմնականում տեղակայված են ԱՄՆ-ում, Արևմտյան Եվրոպայում և Ճապոնիայում: Մասնագետների գնահատմամբ՝ այս ճառագայթման օգտագործումից համաշխարհային տնտեսության տարեկան եկամուտը կազմում է շուրջ 750 միլիարդ դոլար:-0-
Ծանոթացեք լուրերին առաջինն ու քննարկեք դրանք մեր Telegram-ում
21:00 24.10.2011