ԱՐՏԵՐԿՐՈՒՄ ՀԱՅԿԱԿԱՆ ՏՏ-ԱՐՏԱԴՐԱՆՔԻ ՎԱՃԱՌՔԻ ԿԵՆՏՐՈՆ ԿՍՏԵՂԾՎԻ ՀԱՅԱՍՏԱՆՈՒՄ
ԵՐԵՎԱՆ, 23 փետրվարի, /ԱՌԿԱ/. Արտերկրում հայկական ՏՏ-արտադրանքի վաճառքի կենտրոն կստեղծվի Հայաստանում։ Այս մասին շաբաթ օրը Աղվերանում լրագրողներին տեղեկացրել է Հայաստանի տեղեկատվական տեխնոլոգիաների ընկերությունների միության (UITE) նախագահ, «Sourcio» ընկերության գլխավոր տնօրեն Հովհաննես Ավոյանը։
Նրա խոսքերով, կենտրոնի ստեղծման նախագիծն արդեն քննարկվել է ՀՀ վարչապետ Տիգրան Սարգսյանի հետ, ով նախնական դրական գնահատական է տվել և աջակցություն ցուցաբերելու պատրաստակամություն հայտնել։
Ինչպես նշել է UITE նախագահը, կենտրոնի ստեղծման համար ծրագրվում է ներդնել նվազագույնը 0,5 միլիոն դոլար։
Միաժամանակ նա տեղեկացրել է, որ բանակցություններ են ընթանում ֆինանսավորման երեք հնարավոր աղբյուների և մասնավոր հատվածի, պետության և դոնոր կազմակերպությունների կողմից Կենտրոնի կապիտալի ձևավորման վերաբերյալ, որն արդեն նախագծի համաֆինանսավորման պատրաստակամություն է հայտնել։
«Կենտրոնը զբաղվելու է արտերկրում հայկական ՏՏ-արտադրանքի առաջխաղացմամբ և իրացմամբ՝ միաժամանակ ընդգրկելով ինչպես տարածաշրջանային շուկաները, այնպես էլ ԱՄՆ-ն ու Եվրոպան», - ասել է Ավոյանը։
Նրա խոսքերով, այս նպատակով կիրականացվի մարքեթինգի և ՏՏ-արտադրանքի վաճառքի համապատասխան կադրերի նախապատրաստում, որոնք վաճառք կիրականացնեն ինչպես վիրտուալ ռեժիմով, այնպես էլ հեռախոսի, այլ երկրներում անմիջական ներկայացուցիչների միջոցով։
Ինչպես կարծում է UITE նախագահը, այս տեսակետից անհրաժեշտ է ուշադիր ուսումնասիրել նաև ասիական, ռուսական, ինչպես նաև թուրքական շուկաները։
«Հայաստանում կան մրցունակ ընկերություններ և արտադրանք, որը կարող է հաղթահարել համաշխարհային ճգնաժամի խնդիրներն ու իր տեղը զբաղեցնել համաշխարհային շուկայում», - ասել է Ավոյանը։
Նրա խոսքերով, հայկական ընկերությունների բարձր մակարդակի, ներուժի և մրցունակ առավելության մասին է վկայում այն փաստը, որ Հայաստանում իրագործվում են համաշխարհային խոշորագույն կորպորացիաների մշակումները, որոնք երկրում ունեն հետազոտական և մշակման ինժեներական կենտրոններ։
«Ծրագրվում է, որ արդեն մոտ ժամանակներում Կենտրոնը կսկսի իր աշխատանքը ոչ մեծ փորձնական ծրագրով, իսկ լիարժեք կերպով կսկսի գործել մինչև 2009 թ.-ի վերջը», - ասել է Ավոյանը։
Նրա խոսքերով, մինչ այդ ծրագրվում է իրագործել արտոնագրային կենտրոնի, ներկայացուցչությունների, մատակարար ցանցերի, ինչպես նաև համակարգող մարմնի ձևավորմանն ուղղված համալիր մոտեցում, որը կարող է դառնալ մասնավոր կամ համատեղ ընկերություն, սակայն, անկասկած է, որ այն հայկական ընկերություն կլինի։
«Ինքնին սա շատ հավակնոտ ծրագիր է, որը լավատեսություն և ոգևորություն է ներշնչում՝ հատկապես հաշվի առնելով պետության կողմից ակնկալվող աջակցությունը», - ասել է Ավոյանը։
«Ձեռնարկությունների ինկուբատոր» հիմնադրամի (Enterprise Incubator Foundation- EIF) ուսումնասիրության համաձայն, 2008 թ.-ի արդյունքում Հայաստանում գործում է 175 ՏՏ-ընկերություն, որոնցից 56-ը օտարերկրյա են կամ արտասահմանյան կապիտալով։ Ընկերությունների մոտ 23 տոկոսը մասնագիտացված է ծրագրավորման ապահովման օտարերկրյա պատվերների կատարման մեջ, 13-ը զբաղվում է վեբ-դիզայնով, 10 տոկոսը զբաղված է ՏՏ ծառայությունների և խորհրդատվության տրամադրման ոլորտում։
2008 թ.-ի արդյունքներով, Հայաստանում ՏՏ-ոլորտի ընդհանուր շրջանառությունը կազմել է 110 միլիոն դոլար, ինչը 27 տոկոսով ավել է 1998 թվականի համեմատ։ 2008 թ.-ի արդյունքում երկրի ՀՆԱ-ում ՏՏ-հատվածի մասնաբաժինը կազմում է 1,2 տոկոս։ Արտադրանքի շուրջ 63 տոկոսն (70 միլիոն դոլար) արտահանվում է, միաժամանակ, հիմնական մասը՝ մոտ 59 տոկոսը, արտահանվում է Հյուսիսային Ամերիկա և ԱՄՆ։-0-
Ծանոթացեք լուրերին առաջինն ու քննարկեք դրանք մեր Telegram-ում
20:48 23.02.2009