«ARMNET AWARDS 2011» ՄՐՑՈՒՅԹԻՆ ՄԱՍՆԱԿՑՈՂ ԿԱՅՔԵՐԻ ԳՐԱՆՑՈՒՄԸ ԿԱՎԱՐՏՎԻ ՆՈՅԵՄԲԵՐԻ 27-ԻՆ 18:00-ԻՆ
ԵՐԵՎԱՆ, 24 նոյեմբերի. /ԱՌԿԱ/. «ArmNet Awards 2011»-ին մասնակցող կայքերի գրանցումը կավարտվի նոյեմբերի 27-ին ժամը 18:00-ին, ինչից հետո կսկսվի հանրային քվեարկությունը և ժյուրիի աշխատանքը, հաղորդում է ArmNet 2011-ի մամուլի ծառայությունը:
Հաղորդագրության համաձայն, ժյուրիի անդամները կուսումնասիրեն և կգնահատեն բոլոր առաջադրված կայքերը և կընտրեն հաղթողներին` ըստ հետևյալ անվանակարգերի` «Դիզայն և հարմարավետություն», «Նորարարություն», «Տեխնիկական կատարում», «Բովանդակություն», «Տարվա առաջընթաց», «Գլխավոր մրցանակ», «Ժողովրդական ընտրություն» (ըստ քվեարկության արդյունքների) և «Orange-ի կողմից սահմանված մրցանակ` լավագույն մոբայլ կայքի համար»:
Ժյուրիի ընտրությանը զուգահեռ կանցկացվի SMS քվեարկություն: Քվեարկելու համար պետք է բջջային հեռախոսահամարից ուղարկել SMS 10-41 կարճ համարին (1 SMS-ի գինը` 50 դրամ, ներառյալ ԱԱՀ), բովանդակության մասում նշելով նախընտրած մասնակից կայքի հատուկ կոդը:
Կոդը հնարավոր կլինի գտնել http://www.armnetawards.am/ կայքում, յուրաքանչյուր կայքի հասցեի կողքը:
«Քվեարկության արդյունքում ամենաշատ ձայներ հավաքած կայքը կճանաչվի «Ժողովրդական ընտրություն» անվանակարգի հաղթող»,- ասվում է հաղորդագրության մեջ:
Մրցույթի արդյունքները կամփոփվեն դեկտեմբերի 3-ին կայանալիք մրցանակաբաշխության ժամանակ:
ArmNet 2011 ամենամյա միջոցառումների շարքի կազմակերպիչներն են SP Marketing Solutions, Orange Armenia և Հայաստանի Ինտերնետ Հանրություն ՀԿ կազմակերպությունները:
ArmNet Awards 2010 մրցույթում ArmNet Awards 2010 Գլխավոր մրցանակին արժանացավ http://parajanovmuseum.am կայքը: Միջազգային ժյուրիի կողմից ընտրվեցին տարվա լավագույն կայքերը 7 անվանակարգերում, ինչպես նաև հատուկ մրցանակ հանձնվեց Orange-ի կողմից լավագույն մոբայլ կայքի համար:
«Լավագույն նորարարություն» անվանակարգում ժյուրին միաձայն լավագույնը ճանաչեց http://e-gov.am կայքը: «Լավագույն տեխնիկական կատարում» անվանակարգում հաղթողը դարձավ http://parajanovmuseum.am կայքը: Orange-ի հատուկ մրցանակը, որը նախատեսված է կայքի լավագույն մոբայլ տարբերակի համար, հանձնվեց mobile.a1plus.am կայքին:--0-
Ծանոթացեք լուրերին առաջինն ու քննարկեք դրանք մեր Telegram-ում
20:08 24.11.2011
