ՀՀ կարգավորող հանձնաժողովը թույլատրել է Icon communications-ին ընդլայնել գործունեության աշխարհագրությունը
ԵՐԵՎԱՆ, 29 հոկտեմբերի. /ԱՌԿԱ/. Հայաստանի Հանրային ծառայությունները կարգավորող հանձնաժողովը (ՀԾԿՀ) չորեքշաբթի նիստի ժամանակ որոշում է ընդունել թույլատրել Հայաստանում անլար Ինտերնետ հաղորդակցության պրովայդեր «ICON Communications» ՓԲԸ-ին՝ ընդլայնել գործունեության աշխարհագրությունը։
Ինչպես տեղեկացրել է Հանձնաժողովի հեռահաղորդակցության վարչության պետ Գևորգ Գևորգյանը, Երևանի տարածքում գործունեություն ծավալելու վերաբերյալ՝ ընկերությանն ավելի վաղ տրամադրած լիցենզիայում որոշ փոփոխություններ են արվել։
«Լիցենզիայի տեքստից հանվել են «Երևան քաղաք» բառերը, ինչը թույլ կտա ICON Communications-ին հետագայում գործունեություն ծավալել նաև մայրաքաղաքի սահմաններից դուրս», - ասել է նա։
ICON Communications-ի գործադիր տնօրեն Ադամ Կաբլանյանն իր հերթին «ԱՌԿԱ» գործակալությանը տեղեկացրել է, որ մինչև 2010 թ.-ն ընկերությունը կկարողանա ապահովել Ինտերնետ-ծառայությունների հասանելիություն երկրի ողջ տարածքում և այդ նպատակով մտադիր է ներդնել շուրջ 10 մլն դոլար։
Կաբլանյանը նշել է, որ Հայաստանի մարզերում գործունեության աշխարհագրության ընդլայնման ժամանակացույցի մշակումը դեռևս ավարտված չէ։ «Մենք ունենք միայն նախնական պլանը, և բոլոր հարցերը կհստակեցվեն երկու-երեք ամսվա ընթացքում», - ասել է նա։
Միաժամանակ ICON Communications-ի տնօրենը նշել է, որ մինչև 2009 թ.-ի ապրիլ ընկերության գործունեությունը հիմնականում կենտրոնացված կլինի մայրաքաղաքում։
ICON Communications ընկերությունը Հայաստանում հիմնվել է 2007թ. վերջին և արդեն ստացել է անհրաժեշտ բոլոր արտոնագրերն ու ռադիոհաճախականությունները WiMAX ցանց ներդնելու համար։ Ներկայումս ընկերությունն ունի շուրջ 25 աշխատակից, որոնց թիվը նախատեսվում է կրկնապատկել մինչև տարեվերջ։ -0-
Ծանոթացեք լուրերին առաջինն ու քննարկեք դրանք մեր Telegram-ում
23:47 29.10.2008