Հայ դպրոցականները dasaran.am նախագծի հատուկ էջում Հայաստանի թանգարանային կյանքին ծանոթանալու հնարավորություն կունենան
ԵՐԵՎԱՆ, 3 ապրիլի. /ԱՌԿԱ/. Dasaran.am կրթական ծրագրի կայքում կստեղծվի թանգարաններին նվիրված նոր էջ։
Էջի ստեղծումը նախատեսված է համագործակցության հուշագրով, որն ուրբաթ ստորագրվել է ՀՀ մշակույթի նախարարության, «Նոր սերնդի դպրոց» ՀԿ–ի և ԻԿՕՄ-ի հայկական թանգարանների ազգային կոմիտեի միջև։
Նոր էջում աշակերտները կհամալրեն իրենց գիտելիքներն ինչպես ազգային, այնպես էլ համաշխարհային մշակութային արժեքների մասին տեղեկատվությամբ, հաղորդակից կլինեն ընթացիկ մշակութային կյանքին, կծանոթանան հայաստանյան թանգարանների դերին, նշանակությանը և գործունեությանը:
Ինչպես փաստաթղթի ստորագրումից հետո նշեց ՀՀ մշակույթի փոխնախարար Ներսես Տեր–Վարդանյանը, Համագործակցության հուշագիրը նպատակաուղղված է դպրոց-թանգարան կապի ամրապնդմանը, աշակերտների շրջանում թանգարան հաճախելու մշակույթի ձևավորմանը, մշակութային արժեքների սերմանմանը, համակողմանիորեն զարգացած սերնդի կրթմանն ու դաստիարակմանը:
«Նոր սերնդի դպրոց» ՀԿ–ի հիմնադիր և նախագահ Սուրեն Ալոյանն իր հերթին ընդգծեց, որ dasaran.am–ի հատուկ էջի ստեղծում կնպաստի տեղեկատվական տեխնոլոգիաների գրագետ և նպատակային կիրառմանը, ինչպես նաև մտավոր ներուժի ու ստեղծագործական մտածողության զարգացմանը:
ԻԿՕՄ-ի հայկական թանգարանների ազգային կոմիտեի նախագահ Մարինե Արոյանն ավելացրեց, որ էջի ամենաակտիվ մասնակիցները խրախուսանքի կարժանանան։ Նրանք Հայաստանում գործող թանգարաններ անվճար այցելելու հնարավորություն կստանան, կմասնակցեն ինտերակտիվ և ճանաչողական էքսկուրսիաների։
2010թ.–ին գործարկված dasaran.am կայքի նպատակն է ստեղծել ուսումնական գործընթացի նկատմամբ վերահսկողության մեխանիզմ, բարձրացնել դպրոցների գործունեության թափանցիկության մակարդակն ու ձևավորել ծնող–աշակերտ–ուսուցիչ կապի համապատասխան համակարգ։
Կրթական ծրագիրը գործում է Հայաստանի բոլոր դպրոցներում։–0–
Ծանոթացեք լուրերին առաջինն ու քննարկեք դրանք մեր Telegram-ում
17:06 03.04.2015
