Ցուկերբերգը խոստացել է կանխել Facebook-ում սպանությունների մասին նորությունների հրապարակումը

ԵՐԵՎԱՆ, 19 ապրիլի. /ԱՌԿԱ/. Facebook-ի հիմնադիր Մարկ Ցուկերբերգը խոստացել է, որ կանի հնարավոր ամեն ինչ` սոցիալական ցանցերում ԱՄՆ-ի Քլիվլենդում սպանության առցանց հեռարձակմանը նմանվող նյութերի հրապարակումը կանխելու համար: Այդ մասին նա հայտարարել է սոֆթ մշակողների համար ընկերության ամենամյա համաժողովի ժամանակ, հաղորդում է ՌԲԿ-ն:

Ցուկերբերգը նշել է, որ այս ուղղությամբ ընկերությունը շատ բան ունի անելու: Նա նաև ցավակցություն է հայտնել Քլիվլենդում հրաձիգի զոհի ընտանիքին և բոլոր ընկերներին:

Facebook-ի գլոբալ գործառնությունների փոխնախագահ Ջասթին Օսոֆսկին ավելի վաղ հայտարարել էր, որ ընկերությունը կփոխի հրապարակումների շուրջ բողոքներ ներկայացնելու գործընթացը, որ օգտատերերը կարողանան անել դա պարզեցված և արագ: Նրա խոսքով, օգտատերերի դժգոհությունները սպանության տեսանյութի վերաբերյալ ընդունվել են հրապարակումից միայն մեկ ժամ անց: Մարդասպանի էջն արգելափակվել է սպանության մասին հաղորդումից 23 րոպե անց, նշել է նա:

Reuters-ի հաղորդմամբ, Facebook-ի հազարավոր աշխատակիցներ դիտարկում են օգտատերերի հաղորդումները կայքում անթույլատրելի նյութերի վերաբերյալ: Ընդ որում, սոցիալական ցանցը 1.9 մլրդ օգտատեր ունի:

Քլիվլենդի (Օհայոի նահանգ) միջադեպը տեղի է ունեցել կիրակի` ապրիլի 16-ին: Սթիվենսը քաղաքի փողոցներից մեկում ծեր տղամարդու է կրակել` հեռարձակելով հանցագործությունը Facebook Live-ով: Նույն օրը նա նրա նկատմամբ հետախուզություն է հայտարարվել: Ոստիկանությանը հաջողվել է նրան հայտնաբերել ապրիլի 18-ին` հարևան Պենսիլվանիա նահանգում: Ոստիկանության հետապնդումից հետո Սթիվենսն ինքնասպան է եղել: -0-

Ծանոթացեք լուրերին առաջինն ու քննարկեք դրանք մեր Telegram-ում

14:41 19.04.2017