ՀՀ ՀԾԿՀ-Ն ԲՋՋԱՅԻՆ ՕՊԵՐԱՏՈՐՆԵՐԻՆ ՏԱՐԱԾՔԱՅԻՆ «ՈՍԿԵ» ԿՈԴԵՐ Է ՏՐԱՄԱԴՐԵԼՈՒ ՀԱՎԱՍԱՐՈՒԹՅԱՆ ՍԿԶԲՈՒՆՔՈՎ
ԵՐԵՎԱՆ, 19 նոյեմբերի. /ԱՌԿԱ/. ՀՀ Հանրային ծառայությունները կարգավորող հանձնաժողովը բջջային օպերատորներին հավասարության սկզբունքով տարածքային «ոսկե» կոդեր է տրամադրելու։ Այս մասին չորեքշաբթի հանձնաժողովի նիստի ժամանակ հայտարարեց ՀԾԿՀ նախագահ Ռոբերտ Նազարյանը։
«Այսուհետ այսպես ասած տարածքային «ոսկե» կոդեր ստանալու բոլոր հայտերի դեպքում Հայաստանի բջջային կապի օպերատորներին դրանք կտրամադրվեն հավասարության սկզբունքի հիման վրա հավասար մրցակցային դաշտ ապահովելու համար»,- ասաց Նազարյանը։
Նրա խոսքերով, հանձնաժողովի նման մոտեցումը թույլ կտա փոփոխություններ չմտցնել Հայաստանի բոլոր երեք բջջային կապի օպերատորների մեկնարկային պայմաններում։
ՀՀ հանրային ծառայությունները կարգավորող հանձնաժողովը նոյեմբերի 19-ին արտահերթ նիստի ժամանակ որոշում ընդունեց France Telecom ընկերությանը, որը Հայաստանում գրանցված է «ՖՏԱ Տելեկոմ» անվան տակ, Հայաստանի բջջային կապի երրորդ օպերատորի գործունեության վերջնական լիցենզիա տալու մասին։ Ընկերությանը կթույլատրվի համարներ տրամադրել +374(0)55 և +374(0)95 կոդերով, տասը տարի ժամկետով համարների փոխարինման իրավունքով։
Մինչ երրորդ օպերատորի հայտնվելը հայկական շուկայում գործում էին բջջայինն կապի երկու ընկերություններ՝ «ԱրմենՏելը», որը 100 տոկոսով պատկանում է ռուսական «ՎիմպելԿոմ»-ին և VivaCell-MTS-ը, որի բաժնետոմսերը պատկանում են MTS ռուսական ընկերությանը։ -0-
Ծանոթացեք լուրերին առաջինն ու քննարկեք դրանք մեր Telegram-ում
01:28 20.11.2008