Հայկական start-up ընկերություններն առաջին անգամ մասնակցում են ClimateLaunchpad միջազգային մրցույթին
ԵՐԵՎԱՆ, 11 հուլիսի. /ԱՌԿԱ/. Հայկական start-up ընկերություններն առաջին անգամ մասնակցում են ClimateLaunchpad բիզնես գաղափարների միջազգային մրցույթին։
Մրցույթն անցկացվում է Եվրոպայի 30 երկրներում։ Այս տարի մրցույթին են միացել Արևելյան Եվրոպայի երեք երկրները` Հայաստանը, Մոլդովան և Ուկրաինան։
Ինչպես «ԱՌԿԱ» գործակալությանը տեղեկացրեց new Technology Education Fund–ի գործադիր տնօրեն Ֆրունզիկ Ոսկանյանը, ClimateLaunchpad Armenia 2016–ի ընտրական փուլին մասնակցելու համար ներկայացվել են մոտ 30 նախագծեր, որոնցից ընտրվել է 14–ը։ Հենց նրանք կպայքարեն երեք լավագույն ազգային նախագծերի կոչման համար։
«Շատ մեծ արդյունքների ենք հասել, ստացել ենք ավելի քան 30 հայտ` կլիմայական փոփոխությունների նվազման, ինչպես նաև մաքուր տեխնոլոգիաների թեմայով և հայտ–գաղափարների թվով գտնվում ենք 8–րդ տեղում Եվրոպայի 30 երկրների շրջանում, որոնք մասնակցում են մրցույթին», – ասաց Մկրտչյանը։
Նրա խոսքով` 14 թիմերը կանցնեն եռօրյա բիզնես դասընթացներ, ինչից հետո` վեց շաբաթական մենթորական դասընթացներ, որոնց ընթացքում կմշակեն իրենց բիզնես հայեցակարգերը, կբարելավեն տեխնոլոգիական առաջարկներն ու կհամապատասխանեցնեն դրանք շուկայի պահանջներին։
Նա նշեց, որ սեպտեմբերին թիմերն արդեն կներկայացնեն իրենց գաղափարները, որոնցից կընտրվեն երեք լավագույնները, որոնք հետո կմասնակցեն հոկտեմբերի 7–8–ը Տալլինում նախատեսված մրցույթին, որի շրջանակում կներկայացվեն ազգային մրցույթների բոլոր հաղթողները։
«Հաղթողները կստանան դրամական պարգևներ, իսկ լավագույն տասը թիմերը կներառվեն Climare-KIC (Հոլանդիա) եվրոպական հիմնադրամի աքսելերացիոն ծրագրին, որի շրջանակում կկազմակերպվեն 4–6 ամսվա տևողությամբ դասընթացներ, ինչից հետո նրանց կընձեռվի սեփական նախագծերի ֆինանսավորման հնարավորություն», – ասաց Ոսկանյանը։
Նա նշեց, որ կան հետաքրքիր գաղափարներ մաքուր տեխնոլոգիաների կիրառման ոլորտում։
Նրա խոսքով` նեկայացվել են մշակումներ կենսաքիմիայի, էլեկտրաէներգիայի նոր տեսակների արտադրության ոլորտներում, առաջարկվել են լուծումներ, որոնք վերաբերում են հողի որակի լավացմանն ու բերքատվության բարձրացմանը և այլն։
Ինչպես նշեց մրցույթի համակազմակերպիչ, Technology & Science Dynamics Inc. ընկերության հիմնադիր և տնօրեն Վահան Շաքարյանը, կլիմայի փոփոխության խնդիրն այսօր բավականին ակտուալ է, ինչի կապակցությամբ մաքուր տեխնոլոգիաների կիրառման հետ կապված ցանկացած գաղափար և լուծում պետք է աջակցություն ստանա և իրականացվի։ –0–
Ծանոթացեք լուրերին առաջինն ու քննարկեք դրանք մեր Telegram-ում
16:49 11.07.2016