DigiTec 2014 6–րդ հանրակրթական միջազգային ստուգատեսն է մեկնարկել երեքշաբթի Երևանում
ԵՐԵՎԱՆ, 14 հունվարի. /ԱՌԿԱ/. DigiTec 2014 6–րդ ամենամյա հանրակրթական միջազգային ստուգատեսն է մեկնարկել հունվարի 14–ին Մխիթար Սեբաստացի կրթահամալիրում։
«Մեզ շատ հաճելի է, որ տարեցտարի ոչ միայն աճում է մասնակիցների թիվը, այլև ընդլայնվում է մեր ստուգատեսի մասնակիցների աշխարհագրությունը», – «ԱՌԿԱ» գործակալությանն ասաց կրթահամալիրի տնօրեն Աշոտ Բլեյանը։
Բլեյանի խոսքերով` ստուգատեսի նպատակն է ներկայացնել, խրախուսել և տարածել թվային տեխնոլոգիաների, կրթության ոլորտի նախագծերի և նոր գործիքների արդյունավետ օգտագործման փորձը։
Կրթահամալիրի տնօրենը տեղեկացրեց, որ ստուգատեսին կարող են մասնակցել ոչ միայն Հայաստանի և արտերկրի հանրակրթական դպրոցների սաներն ու ուսուցիչները, այլև անհատ անձինք` առանց որևէ տարիքային սահմանափակման։
Բլեյանը պատմեց, որ ստուգատեսին մասնակցելու համար հարկավոր է հունվարի 14–ին մինչև փետրվարի 3–ը ներառյալ ներկայացնել նորարար տեխնոլոգիաների ոլորտին նվիրված աշխատությունը կամ աշխատությունները ցանկացած սոցիալական ցանց` ուղարկելով հղումը digitec@mskh հասցեով։
Դրանից հետո փետրվարի 3–6–ը հատուկ ընտրված հանձնաժողովը կուսումնասիրի բոլոր ստացված հայտերը, իսկ փետրվարի 7–ի երեկոյան կհրապարակի հաղթողների անունները, որոնց կհանձնվեն հուշանվերներ և խրախուսական նվերներ, ինչպես նաև Սինգապուրում կայանալիք միջազգային ճամբարի ուղեգիր։
Ստուգատեսին ներկայացված է 20 տարբեր անվանակարգ, այդ թվում` «Էլեկտրոնային գիրք», «Ինտերակտիվ դասաժամ», «Օն–լայն TV/TV, Radio & Video Art», «Դիջիթեքը ընտանիքում», «Հեքիաթասաց Դիջիթեք» և «Ուսումնական բլոգ»։
Ստուգատեսի պաշտոնական գործընկերներն են «Մայքրոսոֆթ ԱՐԷՅ»–ը, «Ձեռնարկությունների ինկուբատոր» հիմնադրամը, «Յունիկոմպը», «Ալֆա» ընկերությունը, Տեղեկատվական տեխնոլոգիաների ձեռնարկությունների միությունը։–0–
Ծանոթացեք լուրերին առաջինն ու քննարկեք դրանք մեր Telegram-ում
18:58 14.01.2014