VIVACELL-MTS ՀԱՅԿԱԿԱՆ ՀԵՌԱՀԱՂՈՐԴԱԿՑԱԿԱՆ ԸՆԿԵՐՈՒԹՅՈՒՆԸ ԻՐ ԲԱԺԱՆՈՐԴՆԵՐԻ ՀԱՄԱՐ ՊԱՐԶԵՑՐԵԼ Է ՀԱՇԻՎՆԵՐԻ ԼԻՑՔԱՎՈՐՄԱՆ ԿԱՐԳԸ

ԵՐԵՎԱՆ, 22 մայիսի. /ԱՌԿԱ/. VivaCell-MTS հայկական հեռահաղորդակցական ընկերությունը իր կանխավճարային բաժանորդների համար պարզեցրել է հաշիվների լիցքավորման կարգը։ Ինչպես հինգշաբթի մամուլի ասուլիսի ժամանակ տեղեկացրել է VivaCell-MTS ընկերության գլխավոր տնօրեն Ռալֆ Յիրիկյանը, ընկերության կանխավճարային բաժանորդները «Լիցք» նոր ծառայության շնորհիվ կկարողանան լիցքավորել իրենց հաշիվներն առանց պլաստիկ կանխավճարային քարտերի ձեռքբերման։

««Լիցք» ծառայությունը նոր այլընտրանքային մոտեցում է այն բաժանորդների համար, ովքեր ցանկանում են լիցքավորել իրենց հաշիվը։ Այժմ պարտադիր չէ գնել պլաստիկ քարտը, ջնջել պաշտպանիչ շերտը, մուտքագրել որոշակի կոդը։ Բավական է այցելել վաճառքի համապատասխան կետ, կատարել վճարում և լիցքավորել հաշիվը հենց այդ գումարին համապատասխան», - պարզաբանել է նա։
Յիրիկյանի խոսքերով՝ բաժանորդը կկարողանա լիցքավորել սեփական հաշիվը յուրաքանչյուր գումարի չափով՝ սկսած 50 դրամից։ Ինչպես նշել է նա՝
«Լիցք» ծառայությունը տրամադրվում է վաճառքի կետերում, որոնց հետ համապատասխան պայմանագիր է կնքված։ Սկզբնական փուլում ծառայությունը տրամադրվում է 911 դեղատների ցանցում, Nokia խանութ-սրահներում և «Փրես-Սթենդ» կրպակներում։

Նա ընդգծել է, որ նոր ծառայության ներդմուծումը չի նշանակում, որ ընկերությունը հրաժարվել է հաշիվների լիցքավորման պլաստիկ քարտերից, որոնք գործելու են «Լիցք» ծառայության հետ զուգահեռ՝ հաշիվը լիցքավորելիս կանխավճարային բաժանորդներին տրամադրելով այլընտրանք։ Յիրիկյանը հատկապես նշել է, որ «Լիցք» ծառայությունը կարևոր նշանակություն ունի բնապահպանության համար, քանի որ որոշ բաժանորդներ պլաստիկ քարտի օգնությամբ հաշիվը լիցքավորելուց հետո այն նետում են գետնին, իսկ նոր ծառայությունը թույլ կտա խուսափել դրանից։

Միաժամանակ հեռահաղորդակցական ընկերության գլխավոր տնօրենը նշել է, որ «Լիցք» ծառայությունը մայիս ամսվա ընթացքում VivaCell-MTS-ի բաժանորդների համար հերթական նորությունը դարձավ։ Յիրիկյանը հիշեցրել է, որ մայիսին ընկերությունն արդեն գործարկել է 3G ցանցը՝ իր բաժանորդների համար հասանելի դարձնելով տեսազանգի ծառայությունները։ Գլխավոր տնօրենն ասել է, որ մայիսին, wap.vivacell.am բջջային կայքի շնորհիվ, ընկերության բաժանորդները հնարավորություն ստացան անմիջապես բջջային հեռախոսից իրական ռեժիմում տեղեկատվություն ստանալ «Զվարթնոց» միջազգային օդանավակայանի չվերթների ժամանումների և մեկնումների ճշգրիտ ժամանակի մասին, ինչպես նաև տեղեկանալ միջազգային ֆուտբոլի լուրերին։

Նա հատկապես նշել է 1000 և 1 SMS ծառայության ներդրումը, որն ազատ շփման հնարավորություն է տալիս լսողական և խոսակցական խնդիրներ ունեցող բաժանորդների համար, ովքեր այժմ կարող են ընդամենը 5 դրամ սակագնով ուղարկել ամսական մինչև 1001 ներցանցային SMS։

VivaCell-MTS («Ղ-Տելեկոմ») Հայաստանում բջջային կապի առաջատար օպերատոր է, որը մատուցում է ձայնային կապի և տվյալների փոխանցման ծառայությունների լայն շրջանակ։ Ընկերությունն աշխատում է Հայաստանի ողջ տարածքում, ունի GSM 900/1800 ստանդարտի համապատասխանության հավաստագիր՝ մինչև 2019թ։

VivaCell-MTS-ի բաժնետոմսերի 80% բաժնետերը Ռուսաստանում և ԱՊՀ երկրներում բջջային կապի խոշորագույն օպերատոր «Բջջային հեռահամակարգեր» (МТС) ԲԲԸ-ն է, իսկ մնացած 20%-ը պատկանում է Fattouch Group լիբանանյան ներդրումային ընկերությանը։ -0-

Ծանոթացեք լուրերին առաջինն ու քննարկեք դրանք մեր Telegram-ում

19:12 22.05.2009