«ՕՐԱՆԺ-ԱՐՄԵՆԻԱ» ՀԵՌԱՀԱՀԱՂՈՐԴԱԿՑԱԿԱՆ ԸՆԿԵՐՈՒԹՅՈՒՆԸ ՄՏԱԴԻՐ Է 80 ՄԼՆ ԵՎՐՈ ՆԵՐԴՆԵԼ ՀԱՅԱՍՏԱՆՈՒՄ 2009 ԹՎԱԿԱՆԻՆ. ԸՆԿԵՐՈՒԹՅԱՆ ՓՈԽՆԱԽԱԳԱՀ
ԵՐԵՎԱՆ, 9 հունիսի. /ԱՌԿԱ/. «Օրանժ Արմենիա» ընկերությունը մտադիր է 80 մլն եվրո ներդնել հայկական շուկայում և 400 աշխատատեղեր բացել մինչև 2009 թվականի վերջը, երեքշաբթի հայտարարեց «Օրանժ» ընկերության Եվրոպայի գծով փոխնախագահ Օլաֆ Սուանտին ՀՀ տրանսպորտի և կապի նախարար Գուրգեն Սարգսյանի հետ հանդիպման ժամանակ։
Ինչպես «ԱՌԿԱ» գործակալությանը հայտնեցին նախարարության մամուլի ծառայությունից, Օլաֆ Սուանտին շնորհակալություն հայտնելով նախարարության և ընկերության միջև սերտ համագործակցության համար՝ հավելեց, որ որոշ խնդիրների լուծման համար շատ կարևոր է տրանսպորտի և կապի նախարարության աջակցությունը:
«Սուանտին հայտնեց, որ «Օրանժ Արմենիաի» նպատակն է Հայաստանում ձեռք բերել առաջատարի, նորարարի և ամենասիրվածը լինելու համբավ: Այդ նպատակին հասնելու համար միայն այս տարի նախատեսվում է ներդնել 80 մլն եվրո, իսկ ընդհանուր առմամբ բացել 400 աշխատատեղ»,- ասվում է հաղորդագրությունում։
Սուանտիի խոսքերով՝ մեծ հնարավորություն կա Հայաստանում ընկերության արժեքների ներգրավման և հաջող բիզնես սկսելու համար։ Նա հավաստիացրեց, որ 2009 թվականի վերջին եռամսյակում ընկերությունը կսկսի Ինտերնետ և բջջային կապի ծառայությունների մատուցումը։
Նախարարը ողջունելով միջազգային բաց մրցույթում հաղթող ճանաչված «Օրանժ» ընկերության մուտքը Հայաստանի բջջային կապի ոլորտ` նշեց, որ այն հնարավորություն կտա էլ ավելի ընդլայնել և ազատականացնել այդ շուկան:
Սարգսյանը հիշեցրեց, որ «Օրանժ Արմենիան» իր գործունեությունն արդեն վեց ամիս է սկսել Հայաստանում և հույս հայտնեց, որ մինչև տարեվերջ այն լիովին կսկսի գործել: Նախարար Սարգսյանը տեղեկացրեց, որ տրանսպորտի և կապի նախարարությունն իր լիազորությունների սահմաններում ամեն ինչ անում է ընկերության լիարժեք գործունեությունը բնականոն հունով առաջ տանելու համար:
Մասնավորապես, Սարգսյանի խոսքերով, պայմանավորվածություն կա ամեն շաբաթվա աշխատանքային վերջին օրը հանդիպել «Օրանժ Արմենիաի» տնօրեն Բրունո Դութուայի հետ և քննարկել կատարած աշխատանքը, առաջած խնդիրները:
«Կարծում եմ՝ անմիջական շփման այս ձևը արդյունավետ աշխատանքների իրականացման համար բավականին նպատաստավոր պայմաններ է ստեղծում, և քանի որ հասարակությունն անհամբեր սպասում է ձեր ընկերության աշխատանքների մեկնարկին, ուստի կարծում եմ, որ անհաժեշտ է էլ ավելի հրապարակային աշխատել»,- նշեց նախարարը:
ՀՀ հանրային ծառայությունները կարգավորող հանձնաժողովը նոյեմբերի 19-ին արտահերթ նիստի ժամանակ որոշում ընդունեց France Telecom ընկերությանը, որը Հայաստանում գրանցված է «ՖՏԱ Տելեկոմ» անվան տակ, Հայաստանի բջջային կապի երրորդ օպերատորի գործունեության վերջնական լիցենզիա տալու մասին։ France Telecom ընկերությանը լիցենզիան տրամադրվել է 15 տարի ժամկետով՝ ևս 15 տարի երկարացման իրավունքով։ Ընկերությանը թույլատրվել է համարներ տրամադրել +374(0)55 և +374(0)95 կոդերով, տասը տարի ժամկետով համարների փոխարինման իրավունքով։
Մինչև երրորդ օպերատորի մուտքը, հայկական շուկայում գործում էին բջջայինն կապի երկու ընկերություններ՝ «ԱրմենՏելը», որը 100 տոկոսով պատկանում է ռուսական «ՎիմպելԿոմ»-ին և VivaCell-MTS-ը, որի բաժնետոմսերը պատկանում են MTS ռուսական ընկերությանը։ -0-
Ծանոթացեք լուրերին առաջինն ու քննարկեք դրանք մեր Telegram-ում
21:32 09.06.2009
