Ucom ցանցն ամբողջությամբ կծածկի Հայաստանը երկու տարվա ընթացքում
ԵՐԵՎԱՆ, 4 ապրիլի. /ԱՌԿԱ/. Ucom ընկերության օպտիկամանրաթելային ցանցն ամբողջությամբ կծածկի Հայաստանն արդեն 2014 թվականի երկրորդ եռամսյակում, չորեքշաբթի ասաց ընկերության տնօրեն Հայկ Եսայանը «Նովոստի» միջազգային մամուլի կենտրոնում:
«Առաջիկա ամսվա ընթացքում մենք արդեն կսկսենք ցանցի անցկացումը Հայաստանի մարզերում, իսկ 2 տարվա ընթացքում արդեն կունենանք մեծ օպտիկամանրաթելային ցանց, որն ամբողջովին կծածկի հանրապետությունը»,- ասաց Եսայանը:
Նա նշեց, որ օպտիկամանրաթելային ցանցի կառուցումը, առաջին հերթին, կսկսվի Գյումրի, Վանաձոր քաղաքներում, ինչպես նաև Երևանի հարակից շրջաններում:
«Այդպիսով, երկրի մարզերի մեր բաժանորդները հնարավորություն կունենան օգտվել այն բոլոր ծառայություններից, որոնք մենք տրամադրում ենք Երևանում»,- ասաց նա:
Եսայանը նշեց նաև, որ երկրի մարզերի համար կմշակվեն հատուկ սակագնային փաթեթներ: «Մենք հասկանում ենք, որ երկրի մարզերի և մայրաքաղաքի սոցիալական պայմանները տարբեր են: Հաշվի առնելով այդ՝ մենք կմշակենք հատուկ սակագնային փաթեթներ մարզերի համար, որոնք կհրապարակվեն առաջիկա երեք ամիսներին»,- ավելացրեց նա:
Եսայանը միաժամանակ ընդգծեց, որ ցանցի ընդլայնմանը զուգընթաց ընկերության կողմից տրամադրվող ծառայությունների որակը չի նվազի, այլ հակառակը՝ կբարձրանա:
«Բաժանորդների թվի աճի հետ մեկտեղ ավելանում են մեր արագությունները: Դա կարող է ոչ այնքան հասկանալի լինել, բայց դա այդպես է: Եթե 2009 թվականին բաժանորդներին տրամադրվող նվազագույն արագությունը կազմում էր 128 Կբիթ/վրկ, ապա այսօր այն կազմում է 8 Մբիթ/վրկ, այսինքն՝ 64 անգամ արագ: Այժմ մենք վերազինում ենք ցանցը, որն ի սկզբանե նախատեսվում էր 10 հազար բաժանորդի համար, իսկ այսօր կարող է բավարարել 250 հազ. բաժանորդի պահանջները, իսկ ֆիքսված հեռախոսակապով մենք ապահովում ենք մոտ 2 մլն բաժանորդի»,- նշեց նա:
Եսայանը տեղեկացրեց, որ ընթացիկ տարվա հունվարից Ucom-ն իր մայրուղային գիծը միացրել է վրացական Caucasus On-Line ընկերությանը, և դրա արդյունքում Սև ծովի հատակով անմիջականորեն միացել է Ֆրանկֆուրտից եկող Ինտերնետ-մայրուղային կապուղուն:
«Ասյպիսով, այսօր մենք Ինտերնետ ենք ստանում Եվրոպայից առանց երրորդ (տեղական) օպերատորի մասնակցության: Դա մեզ թույլ է տալիս գործնականում առանց խափանումների Ինտերնետ-ծառայություններ տրամադրել մեր բաժանորդներին»,- ասաց Եսայանը:
Ucom-ի տնօրենը հայտնեց նաև, որ երկու ամիսների ընթացքում ընկերությունը պատրաստվում է վրացական մայրուղուն միացնել երկրորդ մայրուղին Ինտերնետ-ծառայությունների անխափան տրամադրման համար:
UCom (Universal Communications) ընկերությունը հիմնադրվել է 2007թ.-ին և մի շարք ավանդական և ժամանակակից բարձրարդյունավետության ծառայություններ է մատուցում հեռահաղորդակցության հայկական շուկայի համար։ Ericsson ընկերությանաջակցությամբ ընկերությունը ստեղծել է լայնաշերտ հասանելիության ցանց, որն ընդգրկում է Հայաստանի մայրաքաղաք Երևանը՝տրամադրելով Ինտերնետի, IP-հեռախոսակապի և ինտերնետ-հասանելիության ծառայություններ:-0-
Ծանոթացեք լուրերին առաջինն ու քննարկեք դրանք մեր Telegram-ում
14:42 04.04.2012