ՀԱՅԿԱԿԱՆ ՓՈՍՏԱՅԻՆ «ՀԱՅՓՈՍՏ» ՕՊԵՐԱՏՈՐԸ ԳՈՐԾԱՐԿԵԼ Է 30 ՓՈՍՏԱՅԻՆ ԲԱԺԱՆՄՈՒՆՔՆԵՐԻ ՎԵՐԱՆՈՐՈԳՄԱՆ ԾՐԱԳԻՐ
ԵՐԵՎԱՆ, 19 հոկտեմբերի. /ԱՌԿԱ/. Հայկական փոստային «Հայփոստ» օպերատորը 30 փոստային բաժանմունքների վերանորոգման մարաթոն է սկսել մինչև 2009 թ.-ի վերջը, երկուշաբթի Շենգավիթ համայնքի Գարեգին Նժդեհի 7 հասցեում գտնվող Հայփոստի Երևանի թիվ 0006 նորացված փոստային բաժանմունքի բացման արարողության ժամանակ ասաց «Հայփոստ» ՓԲԸ գլխավոր տնօրենի պաշտոնակատար Արման Խաչատուրյանը:
Նրա խոսքերով՝ փոստային բաժանմունքների նորացումը թույլ կտա արդյունավետ և որակով սպասարկել հաճախորդներին:
«Մենք մտադիր ենք առավելագույնս որակյալ սպասարկում տրամադրել և բավարարել հաճախորդների կարիքները տրամադրվող ծառայությունների ողջ սպեկտրում»,- ասաց Խաչատուրյանը:
Ինչպես նշեց ՀՀ կապի և տրանսպորտի նախարար Գուրգեն Սարգսյանը, վերջին շրջանում «Հայփոստի» կողմից բավականին ակտիվ գործունեություն է ծավալվում, այդ թվում հաճախորդների հետ շփման գործում, քանի որ ընկերությունը սկսել է վերանորոգել ու վերականգնել բոլոր փոստային բաժանմունքները:
Նա նշեց, որ հայտարարելով 30 բաժանմունքների վերանորոգման մարաթոնի մեկնարկը՝ «Հայփոստը» պարտավորվել է սեփական ուժերով վերանորոգել դրանք ու համապատասխանեցնել ժամանակակից տեխնիկական պահանջներին:
«Մենք ողջունում ենք այդ նախաձեռնությունը, որը պետք է շարունակություն ունենա նաև հաջորդ տարիներին, քանի որ «Հայփոստն» ունի շուրջ 800 բաժանմունք երկրի ողջ տարածքում, որոնք պետք է համապատասխանեցվեն միջազգային չափանիշներին»,- ասաց Սարգսյանը:
Նախարարը գոհունակություն հայտնեց փոստային բաժանմունքի նոր տեսքից՝ նշելով, որ ինքն անձամբ հաճախ օտգվում է դրա ծառայություններից, քանի որ ապրում է այդ շրջանում, նաև հույս հայտնեց, որ ընկերության կողմից տրամադրվող ծառայությունների շրջանակը կընդլայնվի:
Բարեփոխումների ծրագրի համաձայն՝ «Հայփոստ» ՓԲԸ-ն ծրագրում է շուրջ 30 նորացված փոստային մասնաճյուղ և բաժանմունք բացել Հայաստանում մինչև 2009 թ.-ի վերջը, որոնցից 20՝ Երևանում: Նորացման շրջանակներում իրականացվում է փոստային բաժանմունքների վերականգնում և վերանորոգում, ենթակառուցվածքի նորացում, տեխնիկական վերազինում և ծրագրային ապահովման թարմացում: Նախատեսվում է նաև կադրերի վերապատրաստման ծրագիր և on-line սպասարկման համակարգի ներմուծում:
«Հայփոստ» ընկերությունը հոլանդական Haypost Trust Management-ին հավատարմագրային կառավարման հանձնելու մասին պայմանագիրը ստորագրվել է Երևանում՝ 2006թ. նոյեմբերի 30-ին։ Պայմանագրի համաձայն, «Հայփոստ» ընկերոությունը հավատարմագրային կառավարման է տրվում 5 տարի ժամկետով՝ պայմանագիրը նույն ժամանակով երկարացնելու իրավունքով։
«Հայփոստ» ՓԲԸ-ն ՀՀ փոստային կապի ազգային օպերատորն է, որը գործում է ՀՀ ողջ տարածքում՝ իր 900 փոստային բաժանմունքների միջոցով:--0—
Ծանոթացեք լուրերին առաջինն ու քննարկեք դրանք մեր Telegram-ում
01:13 20.10.2009