ՀԱՅԱՍՏԱՆԻ ՀԾԿՀ-Ն ԹՈՒՅԼԱՏՐԵԼ Է ORANGE ARMENIA ԸՆԿԵՐՈՒԹՅԱՆԸ ԼՐԱՑՈՒՑԻՉ ՌԱԴԻՈՀԱՃԱԽԱԿԱՆՈՒԹՅՈՒՆՆԵՐ ԶԲԱՂԵՑՆԵԼ
ԵՐԵՎԱՆ, 4 նոյեմբերի. /ԱՌԿԱ/. Հայաստանի Հանրային ծառայությունները կարգավորող հանձնաժողովը չորեքշաբթի նիստի ժամանակ թույլատրել է Orange Armenia ընկերությանը լրացուցիչ ռադիոհաճախականություններ զբաղեցնել ռադիոռելեյային կապի գիծ կազմակերպելու համար։
Ինչպես նշեց ՀԾԿՀ հեռահաղորդակցության վարչության պետի տեղակալ Համլետ Ծատուրյանը, ռադիոհաճախականություններն անհրաժեշտ են ընկերությանը բջջային ռադիոկապի ցանցի ընդլայնման համար։
«Արտոնագիրն ընկերությանը տրամադրվել է 10 տարի ժամկետով»,- հայտնեց Ծատուրյանը։
Նա հավալեց նաև, որ ընկերությունը պարտավորվում է մինչև 2010 թ.-ի փետրվարի 1-ը զբաղեցնել հետևյալ ռադիոհաճախականությունները՝ 18250/19260, 18305/19315, 18360/19370, 18415/19425. 18525/19535/ և 18580/19590 ՄՀՑ։
Բջջային երրորդ Օrange Armenia օպերատորը հայկական շուկա կմտնի նոյեմբերի 5-ին և կսկսի շարժական հեռախոսակապի և ինտերնետի ծառայությունների տրամադրումը։
«Orange Armenia»-ն, որը France Telecom-ի 100 տոկոսանոց դուստրն է (ապրանքանիշը՝ Orange) վերջնական արտոնագիրը ստացել է 2008թ. նոյեմբերի 19-ին: Լիցենզիան տրամադրվել է 15 տարի ժամկետով՝ ևս 10 տարի երկարացման -իրավունքով։ --0--
Ծանոթացեք լուրերին առաջինն ու քննարկեք դրանք մեր Telegram-ում
20:37 04.11.2009