«ԱՐՄԵՆՏԵԼ» ԸՆԿԵՐՈՒԹՅՈՒՆԸ ՄԱՍՆԱԿՑՈՒՄ Է ԵՐԻՏԱՍԱՐԴՈՒԹՅԱՆ ՀԱՅՐԵՆԱՍԻՐԱԿԱՆ ԴԱՍՏԻԱՐԱԿՈՒԹՅԱՆ ԾՐԱԳՐԻՆ
ԵՐԵՎԱՆ, 16 նոյեմբերի. /ԱՌԿԱ /. «ԱրմենՏել» ՓԲԸ-ն (ապրանքանիշը՝ Beeline) հանդես եկավ որպես երիտասարդների հայրենասիրական դաստիրակությանն ուղղված ծրագրի գլխավոր հովանավոր, որն իրականացվեց «Ազատամարտիկ» ՀԿ-ի կողմից 2009թ-ի հոկտեմեբեր-նոյեմբեր ամիսներին: Ինչպես երկուշաբթի «ԱՌԿԱ» գործակալությանը հայտնեցին ընկերության մամուլի ծառայությունից, ծրագրի շրջանակում ազատամարտիկների զավակների համար կազմակերպվեց այց Հայաստանի սահմանամերձ գյուղեր` Չինարի, Պառավաքար, Կիրանց և Ոսկեպար: «ԱրմենՏելի» հասարակայնության հետ կապերի ծառայության ղեկավար Անուշ Բեղլոյանը նշեց, որ ընկերությունը կարևորում է այս ծրագիրը քանի որ «վառ ապագան հաջողությամբ կերտելու համար չի կարելի մոռանալ Հայրենիքի անցյալը»: «Այս միջոցառումը հնարավորություն տվեց երիտասարդներին հանդիպել և շփվել պատերազմ անցած հերոս տղաների հետ, որը հայրենասիրական արտասովոր դաս եղավ բոլոր մասնակիցների համար»,- ասաց «Ազատամարտիկ» ՀԿ-ի նախագահ Հայկ Հարությունյանը: Միջոցառման ընթացքում պարգևատրվեցին ազատամարտիկները, շնորհակալագրեր հանձնվեցին դպրոցի տնօրեններին ու մանկավարժներին, ովքեր չնայած պատերազմին` շարունակեցին ապրել ու աշխատել սահմանամերձ գյուղերում: Հարգանքի տուրք մատուցվեց զոհված ազատամարտիկների խաչքար հուշակոթողներին: Յուրաքանչյուր գյուղի առաջին դասարանցիները որպես նվեր ստացան գրենական պիտույքներ և գրքեր:
«ԱրմենՏել» ՓԲԸ-ն «ՎիմպելԿոմ» (ապրանքանիշը՝ Beeline) ընկերության 100 տոկոսանոց դուստր ձեռնարկությունն է: «ԱրմենՏելը» տրամադրում է ֆիքսված, շարժական կապի և Ինտերնետ հասանելիության ծառայություններ:--0-
Ծանոթացեք լուրերին առաջինն ու քննարկեք դրանք մեր Telegram-ում
23:52 16.11.2009