404 սխալի պատմությունը

ԵՐԵՎԱՆ, 15 հունվարի. /ԱՌԿԱ/. Մինչ ժամանակակից ինտերնետի համաշխարհային դառնալն այն գլոբալ չի եղել։ Ժամանակակից պրոտոկոլները, որոնք կիրառվում են համացանցում, հնարել են 80–ականներին և 90–ականներին CERN–ում (Միջուկային հետազոտությունների եվրոպական կազմակերպություն), գրում է javarush.ru-ն Facebook-ի իր էջում։

Դրանցից ամենահայտնի պրոտոկոլի` HTTP–ի հայտնագործող Թիմ Բերներս Լին այն ստեղծել է ֆայլի FTP պրոտոկոլի հիման վրա։ Բերներս Լին նաև ցանկացած ինտերնետ օգտատիրոջը հայտնի URI, URL, HTML և WWW հապավումների հեղինակն է։

1992 թվականին հայտնված HTTP 0.9 տարբերակն ընդգրկում էր երեք թվերից բաղկացած կոդեր։ Առաջինը նշանակում էր հաղորդման տեսակը` 1 – տեղեկատվական, 2 – հաջողություն, 3 – վերահասցեավորում, 4 – հաճախորդի սխալ, 5 – սերվերի սխալ։ Երկրորդ թիվը նշում էր հաղորդումների ենթախումբը, երրորդը` այդ խմբի կոնկրետ հաղորդագրությունը։

Օրինակ, 200 («լավ») և 304 («ոչինչ չի փոխվել») կոդերը մենք երբեք չենք տեսնում, որովհետև այդ թվերի փոխարեն բրաուզերներն արտաբերում են էջերի պարունակությունը։

Իսկ ահա 404 սխալը («չի գտնվել») բոլորին լավ հայտնի է։ Դրա հետ բախվել է յուրաքանչյուր օգտատեր, էջի հասցեն բրաուզերի տողում սխալ մուտքագրելիս կամ հղումով գոյություն չունեցող էջ անցնելու փորձի ժամանակ։

404 սխալի հետ կապված է քաղաքային մի լեգենդ։ Իբր մի ժամանակ CERN գրասենյակի չորրորդ հարկում եղել է 404 սենյակը, որտեղ գտնվում էր կենտրոնական սերվերը։ Այնտեղ նստում էր մի քանի մարդ, և նրանք ձեռքով էին մշակում բոլոր ստացվող հարցումները։ Եթե հարցումը սխալ էր, նույն պահին հայտնվում էր «Room 404: file not found» (Սենյակ 404։ ֆայլը չի գտնվել) հաղորդագրությունը։ Ու թեև դա լեգենդ է, այն արդեն վաղուց դարձել է ինտերնետային բանահյուսության անբաժան մասնիկը, իսկ 404 սխալը` մշակույթի և ինտերնետ–սլենգի մի մաս, հումորային արտահայտություն վեբ դիզայներների համար և բարեգործության խորհրդանիշ։

«Որպես մարդ, ով աշխատել է CERN–ում, ասում եմ ձեզ, որ 404–րդ սենյակ գրասենյակի չորրորդ հարկում չի եղել։ CERN–ում սենյակները համարակալում են այլ կերպ` առաջին թիվը շենքի համարն է, մյուս երկուսը` սենյակի համարը։ Բայց թիվ 4 շենքում 04 սենյակ չի եղել, հաշվարկն այնտեղ սկսվում է 410–ից և աճում է` մի հարցրեք, թե ինչու», – ասում է HTTP-ի հայտնագործող Թիմ Բերներս Լին։-0-

Ծանոթացեք լուրերին առաջինն ու քննարկեք դրանք մեր Telegram-ում

15:37 15.01.2016