«Լույս հայի աչքերին» ծրագրի շնորհիվ այս տարի Հայաստանի մարզերի շուրջ 8.000 բնակիչ ակնաբուժական անվճար ծառայություն է ստացել
ԵՐԵՎԱՆ, 13 դեկտեմբերի. /ԱՌԿԱ/. Հայկական ակնաբուժության նախագծի (ՀԱՆ) և «Ucom» Հիմնադրամի համագործակցությամբ արդեն երկրորդ տարին է, ինչ մարզերի բնակիչներն ակնաբուժական անվճար ծառայություններ են ստանում, հաղորդում է Ucom ընկերության մամուլի ծառայությունը։
Այս տարվա աշխատանքները մոտենում են ավարտին. Շիրակի մարզում իրականացվել են ակնային զննումներ ինչպես լայն բնակչության, այնպես էլ դպրոցականների շրջանում, դպրոցներում անցկացվել են հանրային կրթության դասեր, այժմ Գյումրիում կայանած Աչքի շարժական հիվանդանոցում իրականացվում են խորացված հետազոտություններ, լազերային միջամտություններ, վիրահատություններ, շաքարային դիաբետով հիվանդների ակնային զննումներ և լազերային բուժում:
Աշխատանքներին ծանոթանալու նպատակով Շիրակի մարզ այցելեցին Հայկական ակնաբուժության նախագծի հայաստանյան գրասենյակի տնօրեն Նունե Եղիազարյանը և «Ucom» ընկերության գլխավոր տնօրեն Հայկ Եսայանը:
«Շիրակի մարզում «Լույս հայի աչքերին» ծրագրի շրջանակում 3.400-ից ավելի մարդ ակնային զննում է անցել, Աչքի շարժական հիվանդանոցը կայանել է Արթիկում, Մարալիկում և Գյումրիում, որի արդյունքում շուրջ 1.500 բնակիչ խորացված հետազոտություն է անցել, կատարվել է շուրջ 600 վիրահատություն և 200 լազերային միջամտություն: Այս տարի առանձնահատուկ ուշադրություն ենք դարձրել շաքարային դիաբետ ունեցողներին: Աչքի խնամքի վերաբերյալ բաց դասեր և ակնային զննումներ ենք անցկացրել նաև մարզի դպրոցներում: Ուրախ եմ արձանագրել, որ այս տարի ևս «Ucom» Հիմնադրամի համագործակցությամբ մեր աշխատանքի արդյունքում հազարավոր մարդիկ վերագտան իրենց աչքի լույսը», - ասել է Հայկական ակնաբուժության նախագծի հայաստանյան գրասենյակի տնօրեն Նունե Եղիազարյանը:
«Այս նախագծի կարևորագույն ձեռբերումներից է հազարավոր մարդկանց տեսողության անվճար վերականգնումը: Ուրախալի է, որ այս տարի ևս մենք կարողացանք աջակցել հատկապես այն մարդկանց, ովքեր սոցիալական բարդ պայմաններում են ապրում ու նույնիսկ չեն երազում վերականգնել իրենց աչքի լույսը: Ժանակակից տեխնոլոգիաները հիմա առավել, քան երբևէ օգնում են ոչ միայն ճշգրիտ ախտորոշում անել, վիրահատել ու հետևել կազդուրման գործընթացին, այլև վաղ տարիքից տեղեկացված լինել աչքի առողջության պահպանման կանոններին», - նշել է «Ucom» ընկերության գլխավոր տնօրեն Հայկ Եսայանը:
2017թ. ընթացքում «Լույս հայի աչքերին» ծրագրի շրջանակում Կոտայքի, Գեղարքունիքի և Շիրակի մարզերում 8.000-ից ավելի մարդ ակնային զննում է անցել, շուրջ 3.700-ը՝ խորացված հետազոտություն Աչքի շարժական հիվանդանոցում, կատարվել է շուրջ 1.350 վիրահատություն և 470 լազերային միջամտություն, պատրաստվել է բարձր դիոպտրիայի շուրջ 400 ակնոց: 2018թ. սկզբին ծրագիրը կշարունակվի Արագածոտնի մարզում:
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015թ. հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից: Համագործակցելով համաշխարհային գերհզոր ընկերությունների հետ` «Յուքոմը» կարողացել է իր հաստատուն դիրքը գրավել Հայաստանի հեռահաղորդակցման շուկայում: –0–
Ծանոթացեք լուրերին առաջինն ու քննարկեք դրանք մեր Telegram-ում
11:20 13.12.2017
