Փոստային փոխանցումների PosTransfer համակարգը կգործարկվի մինչև տարեվերջ

ԵՐԵՎԱՆ, 16 հունիսի. /ԱՌԿԱ/. Հունիսի 7-ին և 8-ին, «Հայփոստ» ՓԲԸ-ի և Համաշխարհային Փոստային Միության նախաձեռնությամբ, Երևանում կայացել է PosTransfer համակարգի գործարկմանը նվիրված տարածաշրջանային սեմինար, որին մասնակցել են Հայաստանի, Բելառուսի, Ղազախստանի, Ղրղըզստանի, Ռուսաստանի Դաշնության, Ուկրաինայի և Ուզբեկստանի նշանակված փոստային օպերատորների ղեկավարներ և Համաշխարհային Փոստային Միության ներկայացուցիչներ:

Ինչպես հաղորդում է «Հայփոստ» ՓԲԸ–ի մամուլի ծառայությունը, սեմինարի ընթացքում քննարկվել է Համաշխարհային փոստային միության ներքո փոստային դրամական փոխանցումների նոր համակարգի՝ PosTransfer ապրանքանիշի գործարկման հեռանկարները և ժամանակացույցը:

Սեմինարը նվիրված է եղել Համաշխարհային Փոստային Միության նոր ապրանքանիշի կիրառման, էլեկտրոնային վճարումների զարգացման և կատարելագործման հիմնախնդիրներին Արևելյան Եվրոպայի, Կովկասի և Միջին Ասիայի երկրներում: 

Նախագծի առաջին փուլը կգործարկվի վերոնշյալ երկրներում, ինչպես նաև Մոլդովայում և Տաջիկստանում: Պլանավորվում է, որ համակարգը կգործարկվի 2017թ-ի տարեվերջին: 

Միասնական դրամական փոխանցումների համակարգ ստեղծելու որոշումը կայացվել էր դեռևս 2016թ-ի սեպտեմբերին Ստամբուլում կայացած Համաշխարհային փոստային միության կոնգրեսի ընթացքում: 

Արդեն իսկ ստեղծված է միասնական պլատֆորմ, մշակված է ծառայության ֆիրմային ոճն ու լոգոն: 

PosTransfer փոստային դրամական փոխանցումների համակարգը ենթադրում է փոխանցումների ընդունում և վճարում փոստային օպերատորների մասնաճյուղային ցանցի միջոցով՝ կիրառելով հեռահաղորդակցման միջոցներ, այդ թվում բջջային հավելված:

Փոխանցումները հասանելի կլինեն անմիջապես ուղարկելուց հետո, առցանց ռեժիմով՝ բոլոր անդամ երկրների համար միասնական օպերացիոն և տեխնոլոգիական ստանդարտներով: 

Սպասվում է, որ Համաշխարհային Փոստային Միության անդամ մյուս երկրները կմիանան PosTransfer համակարգին հետագա փուլերում: 

Համաշխարհային Փոստային Միությունը միավորում է 193 երկիր։ Այն միջազգային միջկառավարական կազմակերպություն է և ունի ՄԱԿ-ի մասնագիտացված հաստատության կարգավիճակ:

‹‹Հայփոստ›› ՓԲԸ-ն Հայաստանի Հանրապետության փոստային կապի ազգային օպերատորն է, որը տրամադրում է փոստային, ֆինանսական և մանրածախ առևտրային ծառայություններ: Ներկայում ‹‹Հայփոստ›› ՓԲԸ-ն իր գործունեությունը ծավալում է 900 փոստային բաժանմունքներում, որոնք գործում են ՀՀ բոլոր քաղաքներում և գյուղերում:–0–

Ծանոթացեք լուրերին առաջինն ու քննարկեք դրանք մեր Telegram-ում

19:21 16.06.2017