Հայաստանում առաջին PR ազգային մրցանակը կհիմնվի Beeline-ի աջակցությամբ

ԵՐԵՎԱՆ, 29 ապրիլի./ԱՌԿԱ/. «Հայկական Փի Ար ասոցիացիան» և «ԱրմենՏել» ՓԲԸ–ն (Beeline ապրանքանիշ) հայտարարել են Հայաստանում առաջին անգամ PR ազգային մրցանակ հիմնելու մասին։

Ինչպես հայտնում է ընկերության մամուլի ծառայությունը, մրցանակաբաշխության նպատակն է համակարգել Հայաստանում հանրային կապերի (PR) ոլորտում իրականացվող լավագույն ծրագրերը, ինչպես նաև ըստ արժանվույն գնահատել հանրային կապերի մասնագետներին՝ նպաստելով Հայաստանում PR մշակույթի ձևավորմանն ու զարգացմանը:

Ըստ հաղորդագրության, հայկական PR մրցանակաբաշխությունը կօգնի նոր չափանիշ սահմանել հանրային կապերի պատասխանատուների համար, խթանել առողջ մրցակցություն մասնագիտական դաշտում, լինել առավել ստեղծագործ, ինքնատիպ ու առաջադեմ։

«Հանդիսանալով երկրի հեռահաղորդակցության խոշորագույն օպերատորի ղեկավար` իմ փորձով բազմիցս համոզվել եմ, որ հաջողության հասնելու գործում անհրաժեշտ է կայացնել ճիշգրիտ որոշումներ, ընտրել ճիշտ մոդելներ՝ հաղորդակցություն կառուցելու ժամանակ։ Կարևորելով այն, որ հանրային կապերի դերը շարունակաբար աճում է և արհեստավարժ մասնագետները գնալով ավելի գնահատված և պահանջված են դառնում շուկայում, շատ ուրախ եմ, որ հենց Beeline է ստանձնել այս ոլորտի աջակցությունը», - նշեց Հայաստանում Beeline-ի Գլխավոր տնօրեն Անդրեյ Պյատախինը:

Հայաստանում Beeline-ի Հասարակայնության հետ կապերի ղեկավար Տաթև Այրումյանը միաժամանակ նշեց, որ ցանկացած ընկերության գրագետ գործունեության համար ճիշտ PR-ռազմավարության մշակումն ու իրականացումը կենտրոնական նշանակություն ունեն:

«Ունենալով լավագույն փորձերից մեկը PR-ի ոլորտում, Beeline-ը կարևորում է այդ փորձի փոխանակումն այլ կազմակերպությունների մասնագետների հետ: «Հայկական PR մրցանակաբաշխություն»-ը մեզ կտա այդ հնարավորությունը, միևնույն ժամանակ կնպաստի PR-ի գնահատման նոր չափանիշներ ձևավորմանը և կխթանի հայկական PR-մշակույթի զարգացմանը», - նշեց Այրումյանը։

Ինչպես նշեց «Հայկական Փի Ար ասոցիացիա» գիտատեղեկատվական ՀԿ նախագահ, ԵՊՀ ռադիոհեռուստատեսային ժուռնալիստիկայի ամբիոնի դոցենտ, բ.գ.թ. Աստղիկ Ավետիսյանը, արդեն տասը տարի կազմակերպությունն իրականացնում է բազմաբնույթ PR նախագծեր և ուսուցողական ծրագրեր, որոնք նպաստում են PR մշակույթի տարածմանն ու զարգացմանը: Նրա խոսքով, այսօր Հայաստանին անհրաժեշտ են գիտակ հանրային կապերի մասնագետներ, խորհրդատուներ, ովքեր կնպաստեն իրենց ընկերությունների, կազմակերպությունների դրական կերպարի ձևավորմանը, հրապարակայնացմանը, գրագետ և թափանցիկ աշխատաոճի որդեգրմանը:

«Այս ամենը հաշվի առնելով՝ ասոցիացիան նախաձեռնեց Հայկական PR մրցանակաբաշխությունը, որի արդյունքները կբխեն իրականացվող հետազոտությունից: Մրցանակաբաշխությունը հնարավորություն կտա գնահատել հանրային կապերի ոլորտում արձանագրած հաջողություններն ու բացթողումները, մարտահրավերներն ու զարգացման հեռանկարները»,- նշեց Ավետիսյանը։

Մրցանակաբշխության նախապատրաստական աշխատանքների շրջանակում կանցկացվի հանրային կապերի ոլորտում առաջին անգամ իրականացվող հետազոտություն, որը հնարավորություն կտա վերլուծելու Հայաստանում անկախացումից հետո մասնագիտական ձեռքբերումները, պարզելու ոլորտում առկա խնդիրներն ու բացթողումները՝ նպաստելով հանրային կապերի մասնագետի կրթմանն ու արժևորմանը: Հետազոտությունների արդյունքները կամփոփվեն Հայկական PR մրցանակաբաշխությանը:

Մրցանակաբաշխությունը նվիրվում է Հայաստանի և Արցախի անկախության 25-ամյակին, ինչպես նաև «Հայկական Փի Ար ասոցիացիա» գիտատեղեկատվական ՀԿ 10-ամյակին: Հայկական PR մրցանակաբաշխության գլխավոր հովանավորն է Հայաստանում Beeline ընկերությունը:

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ:-0-

 

Ծանոթացեք լուրերին առաջինն ու քննարկեք դրանք մեր Telegram-ում

17:33 29.04.2016