Քրեական գործ է հարուցվել հայկական օպերատորի վաճառքի գրասենյակում կատարված գողության փաստի առթիվ
ԵՐԵՎԱՆ, 25 ապրիլի./ԱՌԿԱ/. Քրեական գործ է հարուցվել Ucom հեռահաղորդակցական օպերատորի վաճառքի գրասենյակում կատարված գողության փաստի առթիվ, երեքշաբթի «ԱՌԿԱ» գործակալությանն ասաց ընկերության մամուլի քարտուղար Դիանա Մնացականյանը։
Նա նշեց, որ ապրիլի 22–ի գիշերը անհայտ անձինք կոտրել են Երևանի Էրեբունի վարչական համայնքում գործող ընկերության սպասարկման գրասենյակի ապակե դուռը, ներխուժել տարածք և գողացել սեյֆը։
Նախնական գնահատմամբ, սեյֆում այդ պահին եղել է ավելի քան 970 հազար դրամ։
«Փաստի առթիվ Երևանի Էրեբունի և Նուբարաշեն համայնքների քննչական վարչության քննչական բաժնում հարուցվել է քրեական գործ», – ասաց Մնացականյանն` ավելացնելով, որ ընկերությունը մինչև քննության ավարտը ձեռնպահ կմնա մեկնաբանություններից ։
Ucom (Universal Communications) հայկական ընկերությունը հիմնադրվել է 2007 թ.: Հանդիսանալով Հայաստանյան հեռահաղորդակցային շուկայի առաջատարներից մեկը, Ucom ընկերությունը առաջարկում է այս ոլորտում ծառայությունների լիարժեք շարք՝ գերարագ սիմետրիկ ինտերնետ, IP հեռուստատեսություն և ֆիքսված թվային հեռախոսակապ: Համագործակցելով Ericsson ընկերության հետ, Ucom-ը կառուցում է նոր սերնդի ամենամեծ օպտիկամանրաթելային ցանցը Հայաստանում:-0-
Ծանոթացեք լուրերին առաջինն ու քննարկեք դրանք մեր Telegram-ում
20:12 25.04.2017
