Beeline-ը շարունակում է ֆիքսված կապի արդիականացման աշխատանքներն Արագածոտնի և Լոռու մարզերում
ԵՐԵՎԱՆ, 12 նոյեմբերի. /ԱՌԿԱ/. Beeline-ը շարունակում է Հայաստանի մարզերում ԱՀԿ-ների և բաժանորդային գծերի արդիականացմանն ուղղված աշխատանքները: Մասնավորապես, 2015թ.-ի նոյեմբեր ամսին մեկնարկել են գործող բաժանորդային հեռախոսագծերի վերամիացման աշխատանքները Լոռու մարզի Թումանյան քաղաքում և Արագածոտնի մարզի Բյուրական և Անտառոտ համայնքներում, հաղորդեցին ընկերության մամուլի ծառայությունից:
Արդիականացման աշխատանքների ավարտից հետո, որը Թումանյանում նախատեսվում է մինչև այս տարվա դեկտեմբերի 12-ը, իսկ Բյուրականում և Անտառոտում` մինչև նոյեմբերի 30-ը, նշված համայնքների բնակիչներին հասանելի կլինեն նոր որակի թվային ֆիքսված կապի և լայնաշերտ ինտերնետի ծառայություններ: Ենթակառուցվածքների թվայնացման աշխատանքների արդյունքում կիրականացվեն սարքավորումների փոխարինման և վերազինման աշխատանքներ, իսկ գործող բաժանորդային գծերը կվերամիացվեն նոր թվային կայանին:
«Beeline-ը շարունակում է ընդլայնել լայնաշերտ ինտերնետի ծառայությունների աշխարհագրությունը` դրանք հասանելի դարձնելով Հայաստանի մարզերի ավելի մեծ թվով բնակիչների համար: Միևնույն ժամանակ մենք շարունակում ենք աշխատել նաև ֆիքսված ցանցի արդիականացման ուղղությամբ` ձգտելով համատեղել մատչելի սակագները որակյալ կապի հետ: Թվայնացման աշխատանքների ավարտից հետո Լոռու և Արագածոտնի մարզերի ևս երեք համայնքների բնակիչներ հնարավորություն կունենան օգտվելու ֆիքսված կապի և լայնաշերտ ինտերնետի մեր պարզ և հարմար ծառայություններից»,- նշել է Հայաստանում Beeline-ի գխավոր տնօրեն Անդրեյ Պյատախինը:
Նշենք, որ 2015 թ. ընթացքում Beeline-ը թվայնացրել է Հայաստանի 6 բնակավայրի հեռախոսային ցանց և մոնտաժել լայնաշերտ ինտերնետի ծառայությունների 832 նոր պորտ: Իսկ 2014 թ. ընկերության ձեռքբերումներից է ֆիքսված հեռախոսակապի ծառայության սակագների նշանակալի նվազեցումը։
«ԱրմենՏել» ՓԲԸ-ն (Beeline ապրանքանիշ) հանդիսանում է «ՎիմպելԿոմ» ընկերությունների խմբի մի մասը: «ՎիմպելԿոմ»-ը հանդիսանում է աշխարհի խոշորագույն ինտեգրված օպերատորներից մեկը, որը գործում է աշխարհի 14 երկրում, իսկ գլխամասային գրասենյակը գտնվում է Ամստերդամում: Ընկերությունների խումբն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման, այնպես էլ լայնաշերտ ինտերնետ հասանելիության ծառայություններ Ռուսաստանում, Ուկրաինայում, Ղազախստանում, Ուզբեկստանում, Տաջիկստանում, Հայաստանում, Վրաստանում, Ղրղզստանում, Լաոսում, Ալժիրում, Բանգլադեշում, Պակիստանում, Զիմբաբվեում, Իտալիայում: -0-
Ծանոթացեք լուրերին առաջինն ու քննարկեք դրանք մեր Telegram-ում
18:27 12.11.2015
