Beeline-ի վաճառքի և սպասարկման գրասենյակ կգործի «Զվարթնոց» օդանավակայանում
ԵՐԵՎԱՆ, 14 օգոստոսի. /ԱՌԿԱ/. «ԱրմենՏել» ՓԲԸ–ի (Beeline ապրանքանիշ) վաճառքի և սպասարկման գրասենյակ կգործի «Զվարթնոց» օդանավակայանում օգոստոսի 15–ից, հայտնում է օպերատորի մամուլի ծառայությունը։
Ինչպես նշվում է հաղորդագրության մեջ, գրասենյակը գործելու է օդանավակայանի ժամանման սրահում՝ այն հատվածում, որտեղ ժամանող ուղեվորները ստանում են իրենց ուղեբեռը:
Այն գործելու է շուրջօրյա և առանց ընդմիջումների: Օդանավակայանի նոր Վաճառքի և սպասարկման գրասենյակում հնարավոր կլինի ձեռք բերել հեռախոսահամար և լիցքավորել գործող համարի հաշիվը:
«Յուրաքանչյուր գրասենյակի բացումը մեզ ավելի ու ավելի է մոտեցնում մեր բաժանորդներին: Իսկ այս գրասենյակի նպատակն է, որ մեր սպասարկումը, պարզ և հարմար ծառայությունները հասանելի լինեն մարդկանց Հայաստան մուտք գործելու առաջին իսկ րոպեներից: Մեր ցանկությունն է, որպեսզի մեր բաժանորդները և մեր երկիր այցելող հյուրերը մշտապես կարողանան կապի մեջ մնալ իրենց դիմավորողների և, իհարկե, հարազատների հետ», - ասել է Հայաստանում Beeline-ի գլխավոր տնօրեն Անդրեյ Պյատախինը:
Այսօրվա դրությամբ Հայաստանի տարածքում գործում է 76 սեփական և դիլերական Վաճառքի և սպասարկման գրասենյակ:
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ:-0-
Ծանոթացեք լուրերին առաջինն ու քննարկեք դրանք մեր Telegram-ում
15:44 14.08.2017