Global Game Jam համակարգչային խաղերի միջազգային hackathon կանցկացվի Հայաստանում առաջին անգամ
ԵՐԵՎԱՆ, 20 հունվարի. /ԱՌԿԱ/. 2017թ․ հունվարի 20-22–ը Հայաստանում առաջին անգամ կանցկացվի Global Game Jam խաղերի միջազգային հեքեթոնը, հաղորդվում է GGJ-ի Facebook-ի էջում։
Մասնակիցների համար տեղերն սահմանափակ են, և այս տարի մասնակցելու է 50 մարդ։ Գրանցումն ակտիվ է մինչև հունվարի 19-ը։ Հեքեթոնի ավարտից հետո մասնակցիները հնարավորություն կունենան իրենց խաղը տեղադրել Global Game Jam կայքում:
Միջոցառման համակազմակերպիչներն են Noor Games-ը և Union of Information Technology Enterprises-UITE-ն։
Այս հեքեթոնը կազմակերպվում է 2009թ․-ից: 2016թ․-ի հունվարին GGJ-ին մասնակցել է 93 երկիր: 2017թ-ին հեքեթոնին մասնակցելու է 98 երկիր, այդ թվում` նաև Հայաստանը։
Global Game Jam-ը խաղերի ստեղծմանը նվիրված և օֆլայն հարթակներում անցկացվող միջազգային խոշորագույն հեքեթոն է: Հեքեթոնի հիմնական նպատակն է` հայտարարված թեմայի շուրջ խաղ ստեղծել 48 ժամվա ընթացքում, որը հայտնի է դառնում միայն միջոցառման օրը: Կարելի է օգտագործել ցանկացած տեխնոլոգիաներ, կանոնները թույլ են տալիս նաև սեղանի խաղ ստեղծել:
Խաղ ստեղծելու համար մասնակիցները բերում են իրենց սարքավորումները (համակարգիչ, մոնիտոր և այլ տեխնիկա)։ Թեմայի հայտարարումից հետո մասնակիցները ձևավորում են մոտ 2-5 մարդկանցից բաղկացած թիմեր, քննարկում են խաղի գաղափարը և անցնում դրա ստեղծմանը։ -0-
Ծանոթացեք լուրերին առաջինն ու քննարկեք դրանք մեր Telegram-ում
14:55 20.01.2017