Ucom-ում նոր տնօրեն չի նշանակվել, կազմակերպությունը շարունակում է բնականոն աշխատանքը Հայկ Եսայանի ղեկավարությամբ
ԵՐԵՎԱՆ, 16 ապրիլի․ /ԱՌԿԱ/․ Գալաքսի գրուփի հաղորդակցության բաժնի կողմից լրատվամիջոցներին է ուղարկվել հաղորդագրություն, որով իրավական ուժ չունեցող փաստաթղթեր են ներկայացվել, ըստ որոնց, իբր ապրիլի 14-ին տնօրենների խորհուրդը նշանակել է Ucom ընկերության նոր տնօրեն: Այս մասին ասվում է ԱՌԿԱ-Telecom հեռահաղորդակցական պորտալին Ucom ընկերության ուղարկած հաղորդագրության մեջ։
Ապրիլի 9-ին Հայկ Եսայանը և Ucom- ի ողջ ղեկավարությունը որոշեցին դադարեցնել իրենց աշխատանքային պարտականությունները, որից հետո ընկերության ավելի քան 800 աշխատակից հրաժարականի դիմում էր ներկայացրել: Ընկերության մամուլի ծառայությունը հայտարարության մեջ նշել է, որ իրավիճակը առաջացել է բաժնետերերի միջև տարաձայնությունների պատճառով:
Ապրիլի 16-ին Galaxy group-ը, որը հանդիսանում է Ucom-ի ամենամեծ բաժնետերը, մամուլի հաղորդագրություն է տարածել, որում ասվում է, որ ապրիլի 14-ին Տնօրենների խորհուրդը Ucom-ի գլխավոր տնօրեն է նշանակել Արա Խաչատրյանին։
«Հայտնում ենք հանրությանը, որ հրապարակված տեղեկատվությունը չի համապատասխանում իրականությանը, Հայկ Եսայանը շարունակում է մնալ ընկերության տնօրեն և ներկայացնում ենք պետ. ռեգիստրի վկայականից քաղվածքը 2020թ․ ապրիլի 16-ի ժամը 18.00 դրությամբ։ Հայտնում ենք նաև, որ միայն Հայկ Եսայանի խնդրանքով են ազատման դիմում գրած բոլոր 865 աշխատակիցները շարունակում ապահովել կազմակերպության բնականոն աշխատանքը»,- ասվում է հաղորդագրության մեջ։
Նշվում է, որ «նման հայտարարությունները ավելորդ լարվածություն և պայթյունավտանգ իրավիճակ են ստեղծում կազմակերպության ներսում»։
«Հորդորում ենք չտրվել նման գործելաոճին և շարունակել բանակցային գործընթացը, որի մասին հայտարարել ենք։Նշենք, որ արդեն երկու օր է Ucom ընկերության և բոլոր բաժնետերերի շահերը ներկայացնող իրավաբանները համատեղ աշխատում են ձեռքբերված պայմանավորվածությունները ամրագրող փաստաթղթի վրա»,- նշվում է հայտարարության մեջ։
Ավելի վաղ Ucom–ի համահիմնադիրներ և բաժնետոմսերի 5,94%–ի սեփականատեր Եսայան եղբայրներն ավելի վաղ առաջարկել են ընկերության մնացած բաժնետերերին գնել նրանց բաժնեմասը 22,1մլրդ դրամով (մոտ 45մլն դոլար), սակայն բաժնետերերը հրաժարվել են վաճառել։ Ապրիլի 14–ին Հայկ Եսայանը հայտարարեց, որ որոշել են վճարել առավելագույն հնարավոր գինը` հաշվի առնելով կազմակերպությունում տարիներ շարունակ ներդրված բոլոր գումարները: Առաջարկի գումարը կազմում է 34,057,000,000 ՀՀ դրամ (մոտ 70 մլն դոլար) բաժնետոմսերի 94,01%–ի համար։
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015թ. հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից: Համագործակցելով համաշխարհային գերհզոր ընկերությունների հետ` Ucom–ը կարողացել է իր հաստատուն դիրքը գրավել Հայաստանի հեռահաղորդակցման շուկայում:-0-
Ծանոթացեք լուրերին առաջինն ու քննարկեք դրանք մեր Telegram-ում
20:17 16.04.2020
