«Վիքիմեդիա Հայաստան» հիմնադրամի գրասենյակի բացմանը ներկա է եղել նաև ՀՀ նախագահը
ԵՐԵՎԱՆ, 19 հունիսի. /ԱՌԿԱ/. ՀՀ նախագահ Սերժ Սարգսյանը ուրբաթ ներկա է գտնվել «Վիքիմեդիա Հայաստան» գիտակրթական հասարակական կազմակերպության գլխավոր գրասենյակի բացմանը:
Հանրապետության նախագահը շրջայց է կատարել գրասենյակում, ծանոթացել «Վիքիմեդիա Հայաստան»-ի գործունեությանը և առաջիկա ծրագրերին: «Վիքիմեդիա Հայաստան» կազմակերպության գրասենյակի բացման արարողության շրջանակում մասնակիցները նաև «Ինտելեկտուալ Ռենեսանս» հիմնադրամի և «Վիքիմեդիա Հայաստան» գիտակրթական հասարակական կազմակերպության համագործակցության արդյունքները ներկայացնող տեսանյութ են դիտել:
«Ինտելեկտուալ Ռենեսանս» հիմնադրամի տնօրեն Հակոբ Հակոբյանը նշել է, որ ««Վիքիմեդիա Հայաստան»–ը ստեղծելու նպատակն է որակյալ հոդվածներով համալրել Wikipedia–ի հայալեզու էջերը, ընդլայնել Վիքի–նախագծերին մասնակցողների թիվն ու շրջանակը, ինչպես նաև` համատեղ մշակել հայալեզու հոդվածները։
Նրա խոսքով` վերջին տարիներին հայկական կողմը իրականացրել է մի շարք wiki–ծրագրեր, որոնց շարքում ամենահայտնին է «Մեկ հայ` մեկ հոդված» ծրագիրը, որը մեկնարկել է 2014 թվականի մարտի 24-ին։ Այդ ծրագիրը լուսաբանում են նաև բազմաթիվ համաշխարհային ԶԼՄ–ներ։
«Ներկա պահին Wikipedia–ն հասանելի է 277 լեզվով, ընդ որում հայերենը 40-րդ տեղում է։ Դա մեզ համար մեծ հաջողություն է», – ավելացրել է Հակոբյանը։
«Wikimedia-Armenia» կազմակերպության նախագահ Սուսաննա Մկրտչյանը նշել է, որ հոդված կարող է ստեղծել և խմբագրել ցանկացած օգտատեր` պահպանելով Wikipedia–ի կանոնները, ընդ որում` առանց հանրագիտարանի կայքում գրանցվելու։
«Երբ որևէ հոդվածում փոփոխություններ են կատարվում, դրանք անմիջապես հասանելի են դառնում կայքի մյուս այցելուներին», – ավելացրել է նա։
Միջոցառմանը մասնակցել են նաև ՀՀ կրթության և գիտության նախարար Արմեն Աշոտյանը, ՀՀ մշակույթի նախարար Հասմիկ Պողոսյանը, «Ինտելեկտուալ Ռենեսանս» հիմնադրամի հիմնադիր Արթուր Ջանիբեկյանը, «Վիքիմեդիա» հիմնադրամի խորհրդի նախագահ Յան Բարտ դե Վրիդը, «Վիքիպեդիա» կրթական ծրագրի ղեկավար Աննա Կովալը։
Wikipedia ինտերնետ–հանրագիտարանների հայալեզու տարբերակը հասանելի է 2005 թվականի փետրվարից։ 2011 թվականին զբաղեցնում էր 90-րդ տեղը ինտերնետ–հանրագիտարանների բաժինների շարքում, իսկ արդեն 2015 թվականի ապրիլի տվյալներով` 40-րդ դիրքում էր։
Հոդվածների քանակով 5-րդ տեղում է Հետխորհրդային պետությունների շարքում (ռուսական, ուկրաինական, ղազախական և լիտվական Wikipedia–ի բաժիններից հետո) և 5-րդը` Մերձավոր Արևելքի երկրների շարքում (առաջին չորս լեզուներն են պարսկերենը, արաբերենը, թուրքերենը և եբրայերենը)։ -0-
Ծանոթացեք լուրերին առաջինն ու քննարկեք դրանք մեր Telegram-ում
18:17 19.06.2015