Եվրոպայի փոստային օպերատորների լիագումար նիստն առաջին անգամ անցկացվում է Երևանում

ԵՐԵՎԱՆ, 20 ապրիլի. /ԱՌԿԱ/. Եվրոպայի փոստային օպերատորների լիագումար նիստն (PostEurop) առաջին անգամ անցկացվում է Երևանում ապրիլի 19-21-ը:

Միջոցառմանը մասնակցելու նպատակով Հայաստան են այցելել ավելի քան 52 երկրների փոստային օպերատորների ղեկավարներ`փոստային ծառայությունների հիմնական միտումները և խնդիրները քննարկելու նպատակով։

Նիստն արդյունավետ հարթակ է փորձի փոխանակման և ոլորտի առաջնահերթությունների քննարկման համար, էլեկտրոնային առևտրի և էլեկտրոնային կառավարման ոլորտում նոր հնարավորությունների բացահայտման համար:

«Փոստային ծառայությունները համաշխարհային տնտեսական համակարգի մասն են կազմում: Այդ իսկ պատճառով բոլոր այն մարտահրավերները, որոնք առկա են տնտեսության մյուս ոլորտներում, կանգնած են նաև փոստի առջև:

Մեր առջև ծառացած հիմնական մարտահրավերներն են հեռահաղորդակցական ոլորտի առաջընթացը, մրցակցությունը, համաշխարհային տնտեսության իրավիճակը», - ասաց լրագրողներին չորեքշաբթի Համաշխարհային փոստային միության գլխավոր տնօրեն Բիշար Հուսեյնը:  

Նրա խոսքով, հարկավոր է ապահովել փոստային ծառայությունների բարձր մակարդակը այնպիսի պայմաններում, երբ տեխնոլոգիաների շնորհիվ վերացել են երկրների միջև սահմանները: «Էլեկտրոնային և առցանց առևտրի զարգացման հետ մեկտեղ զարգացած փոստային ենթակառուցվածքն ունի լայն լոգիստիկ հնարավորություններ», - ասաց Հուսեյնը:

«Այս առումով փոստային ծառայություններն ունեն զզարգացման մեծ ներուժ: Սա բիզնես է, որի ընդհանուր ծավալը կազմում է մոտ տրիլիոն դոլար», - ավելացրեց նա:

PostEurop-ի կառավարման խորհրդի ղեկավար Ժան-Պոլ Ֆորսևիլն իր հերթին նշեց, որ էլեկտրոնային առևտուրը նաև իր ղեկավարության տակ գտնվող կազմակերպության ուշադրության կենտրոնում է և զարգանում է երկու ուղղություններով:

«Խոսքը երկրի ներսում վաճառքների և ծառայությունների որակի կատարելագործման մասին է: Շատ հետաքրքիր ուղղություն է նաև երկրների միջև իրականացվող առևտուրը: Եվրամիության արդեն 30 երկրներ ստեղծել են պետությունների միջև առևտուր իրականացնելու ընդհանուր կառուցվածք: Կառուցվածքն ունի աճի և զարգացման միտում», - ասաց Ֆորսևիլը: -0-

Ծանոթացեք լուրերին առաջինն ու քննարկեք դրանք մեր Telegram-ում

15:21 20.04.2016