Ucom-ը պարզաբանել է «Ձորագետ Հիդրո» ընկերությանն իր բաժնետոմսերն օտարելու մասին տեղեկատվությունը
ԵՐԵՎԱՆ, 6 նոյեմբերի./ԱՌԿԱ/. Կապի հայկական օպերատոր Ucom-ը պարզաբանում է ներկայացրել կապված «Յուքոմ» ՓԲԸ բաժնետոմսերն ամբողջությամբ «Ձորագետ Հիդրո» ՍՊԸ-ին օտարելու հետ կապված տեղեկատվության հետ:
«Մամուլում տարածված այն լուրին ի պատասխան, թե իբր «Յուքոմ» ՓԲԸ բաժնետոմսերն ամբողջությամբ «Ձորագետ Հիդրո» ՍՊԸ-ին օտարելու մասին որոշում է կայացվել, կեղծ են»,- հայտնում են հեռահաղորդակցական օպերատորի մամուլի ծառայությունից:
Մինչդեռ, հաղորդագրության համաձայն, այն տեղեկատվությունը, որ ՀՀ հանրային ծառայությունները կարգավորող հանձնաժողովը նոյեմբերի 4-ի նիստում որոշում է կայացրել համաձայնություն տալ «Յուքոմ» ընկերության՝ «Ֆորաբանկ» բանկին պատկանող 2 մլն 510 հազար 696 հատ բաժնետոմսերն ամբողջությամբ «Ձորագետ Հիդրո» ՍՊԸ-ին օտարելուն, հիմնավոր է և վերաբերում է ոչ թե Ընկերության 100% բաժնեմասերի օտարմանը, այլ ընդամենը «Ֆորաբանկ»-ի բաժնեմասին։
Նաև ընկերությունում մեկնաբանել են լուրն այն մասին, թե «ԱյՅուՆեթվորքս» ՍՊԸ կողմից ՀՀ սնանկության դատարան է ներկայացվել «Յուքոմ» ՓԲԸ-ին սնանկ ճանաչելու պահանջի մասին դիմում, «Յուքոմ» ՓԲԸ-ն հայտարարում է, որ տեղի է ունեցել տեխնիկական սխալ, և նոյեմբերի 5-ին «ԱյՅուՆեթվորքս» ՍՊԸ-ն իր պահանջից հրաժարվելու մասին դիմում է ներկայացրել։
«Նշենք, որ երկու ընկերությունների բաժնետերերի կազմում միևնույն իրավաբանական անձինք են, որոնց միջև բոլոր հարցերը կարգավորվում են բանակցությունների միջոցով։ Սնանկության վերաբերյալ պնդումներն անհիմն են և իրականության հետ որևէ աղերս չունեն»,- նշում են ընկերությունից:
Նաև ընդգծվել է, որ «Յուքոմ» ՓԲ ընկերությունը որպես ռազմավարական նշանակության տնտեսական կառույց շարունակում և շարունակելու է մեծագույն պատասխանատվությամբ իրականացնել իր առջև դրված բոլոր խնդիրները՝ հօգուտ երկրի տնտեսության և բաժանորդների։
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015թ. հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից: Համագործակցելով համաշխարհային գերհզոր ընկերությունների հետ` Ucom–ը կարողացել է իր հաստատուն դիրքը գրավել Հայաստանի հեռահաղորդակցման շուկայում:-0-Ծանոթացեք լուրերին առաջինն ու քննարկեք դրանք մեր Telegram-ում
21:38 06.11.2020