ԶԼՄ. ամերիկացին դատի է տվել Apple ընկերությունը` պնդելով, թե ինքն ավելի շուտ է ստեղծել iPhone-ը
ԵՐԵՎԱՆ, 29 հունիսի. /ԱՌԿԱ/. Ֆլորիդա նահանգի բնակիչը դատի է տվել Apple ընկերությունը` պնդելով, որ ստեղծել է iPhone սարքը նրանցից ավելի շուտ: ՏԱՍՍ-ի հաղորդմամբ այդ մասին գրում է The New York Daily News-ը:
Գյուտարար Թոմաս Ռոսը ներկայացրել է դատարանին 1992 թվականով թվագրված իր գծագրերը, և մտադիր է ապացուցել, որ հենց ինքն է ստեղծել նորագույն տեխնոլոգիաների շուկայի հեղափոխական սարքը, այլ ոչ թե Սթիվ Ջոբսը: Ամերիկացին ընկերությունից 10 մլրդ դոլարից ոչ պակաս փոխհատուցում է պահանջում «իր գաղափարը գողանալու» համար: Նա հայտարարել է, որ ընկերությունը նրան «նշանակալի և անուղղելի վնաս» է հասցրել, որն ամբողջովին չի կարող փոխհատուցվել և գումարով չի չափվում: Նա նաև պահանջում է վճարել իրեն ընկերության վաճառքի ծավալների 1,5 տոկոսը` որպես հոնորար:
Հայտնագործողը մտադիր է ապացուցել, որ իր գծագրերում առկա սարքը, ըստ էության, հենց Apple ընկերության այֆոնն է, որը թողարկվել է ընկերության կողմից 2007 թ.-ին: Արտաքնապես սարքն իսկապես նմանություն ունի հեռախոսի հետ: Այն ուղղանկյունաձև է, որի մեծ մասը զգաղեցնում է էկրանը: Հայցին կցված է ևս մի գծագիր, որի վրա պատկերված է ինչ-որ բացվող մոդել, որի երկու կողմերում սենսորային էկրաններ են: Սարքն ունի գրիչ, ինչը, ինչպես հաղոդում է պարբերականը, ավելի հիշեցնում է Nintendo ընկերության խաղային համակարգը, քան iPhone:
1992 թ.-ին Թոմաս Ռոսը փորձել է պատենտավորել իր հայտնագործությունները, որոնք անվանել է ERD` էլեկտրոնային սարք կարդալու (electronic reading device) սարք: «Իմ ստեղծած տեխնիկական նոր միջոցն իրենից ներկայացնում է կարդալու համար նախատեսված համակարգչային, էլեկտրոնային սարք, որի նպատակն է այլընտրանք ծառայել տպագիր թղթե տարբերակներին, ինչպիսիք են` գրքերը, ամսագրերը, ձեռագրերը և մամուլը», - գրել է ինժեները պատենտի իր հայտում: Պատենտավորման գործը փակվել է 1995 թ.-ին, քանի որ գյուտարարը այդպես էլ չի կարողացել վճարել գրանցման վճարը: Սակայն 2007 թ.-ի հուլիսի 11-ին` Սթիվ Ջոբսի կողմից iPhone-ը ներկայացնելուց 12 օր անց, Ռոսը դատի է տվել ԱՄՆ-ի Պատենտավորման գերատեսչությանը, որն ավելի վաղ հրաժարվել էր ճանաչել նրա հայտնագործությունը:
Հայցում ինժեները գրում է, որ Apple-ի կողմից արտադրվող սարքերը «շատ նման են» իր ստեղծած ERD սարքերին, որոնց գաղափարն է օրիգինալ։
Ռոսն ընկերությունից պահանջում է նաև ոչնչացնել «բոլոր կեղծ պատճենները և կրկնօրինակները»: Նրա խոսքով, 2015 թ.-ի մարտին նա արդեն պահանջել է է Apple-ի գլխավոր տնօրեն Տիմ Քուկից «դադարեցնել անօրինական գործունեությունը և իր ստեղծած տեխնիկական սարքերի դիզայնը»: Դատական փաստաթղթերում նշվում է, որ Apple ընկերության փաստաբան Ջեֆրի Լասկերը գրավոր հայտարարել է, որ բոլոր նմանատիպ հավակնություններն «անհիմն են և օբյեկտիվորեն անապացուցելի են»: -0-
Ծանոթացեք լուրերին առաջինն ու քննարկեք դրանք մեր Telegram-ում
13:50 29.06.2016