«Մեգաֆոնը» և Huawei–ը 5G ցանց են ստեղծում
ԵՐԵՎԱՆ, 19 նոյեմբերի. /ԱՌԿԱ/. Huawei–ը և «Մեգաֆոնը» 5G կապի ցանցերի ստեղծման ոլորտում գործակցելու և դրանք Ռուսաստանի տարածքում օպերատիվ կերպով ներդնելու պայմանավորվածություն են ձեռք բերել, նշված է ընկերությունների պաշտոնական հաղորդագրությունում, հայտնում է Cnews–ը։
Համագործակցության շրջանակում «Մեգաֆոնը» ռուսական մյուս օպերատորներից առաջինը կլինի, որ կկարողանա մասնակցել 5G կապի ստանդարտի մշակմանը և ազդել դրա տեխնոլոգիական առանձնահատկությունների վրա ռուսական հեռահաղորդակցային շուկայի իրողություններին, հաճախականության միջակայքին և լանդշաֆտի պայմաններին հարմարվելու համար։
Huawei–ն իր հերթին նոր ստանդարտի թեստավորում կանցկացնի «Մեգաֆոնի» ցանցերում։ 5G ցանցը կթեստավորվի Ռուսաստանում 2018 թվականի Ֆուտբոլի աշխարհի առաջնության նախաշեմին։ «Ռուսաստանը կլինի այն երկրների ցանկում, որտեղ նորագույն սերնդի բջջային կապ կլինի»,– ասել է «Մեգաֆոնի» զանգվածային շուկայում բիզնեսի զարգացման գործադիր տնօրեն Միխայիլ Դուբինը։
«Հինգերորդ սերնդի ցանցերի հիմնական խնդիրն օգտագործվող հաճախականությունների շրջանակի ընդլայնումն ու ցանցերի տարողության ավելացումն է։ Ակնկալվում է, որ նոր տեխնոլոգիան կլուծի խնդիրը, որի ուղղությամբ աշխատում են աշխարհի բոլոր օպերատորները, կբարձրացնի ցանցային ենթակառուցվածքի արդյունավետությունը»,– ասել են Huawei–ում։
«Գերարագ բջջային ինտերնետի և հասանելի սարքերի ի հայտ գալուն զուգահեռ կտրուկ աճել է նաև ինտերնետ–տրաֆիկի ծավալը»,– ասել են ընկերությունում։
5G տեխնոլոգիան մեծ տարողունակության հաշվին կնվազեցնի ազդանշանի փոխանցման ժամանակ առաջացող բեռնվածությունն ու ուշացումները։ Բաժանորդները կկարողանան զգալ ստանդարտի նշած բջջային ինտերնետի արագությունները, օրինակ`հոլովակը հնարավոր կլինի դիտել առաջին իսկ վայրկյանից` առանց սպասելու, որ այն բեռնվի»։
5G տեխնոլոգիաների մշակումն ակտիվ փուլում է։ Բայց արդեն այժմ փորձագետների մեծամասնությունը միակարծիք է նոր սերնդի կապի աշխատանքի որոշ ասպեկտների հարցում։ Ենթադրվում է, որ 5G ցանցերը «սարքի կողմնորոշում» կունենան։ Այսինքն` բաժանորդային սարքը կմիանա ոչ միայն բազային կայանին, այլ նաև նմանատիպ «հարևան» սարքերին։ «Կարծում ենք, որ առկա ճարտարապետությունը կփոխարինվի սարքերից բաղկացած ճարտարապետությամբ»,– ավելի վաղ ասել էր Bell Labs–ի ինժեներ, հինգերորդ սերնդի ցանցերի գործողության նոր սկզբունքներին նվիրված համատեղ աշխատանքի հեղինակներից մեկը` Ֆեդերիկո Բոկարդին (Federico Boccardi)։
Bell Labs–ի անլար տեխնոլոգիաների մշակման փոխնախագահ Թեոդոր Սայզերն էլ (Theodore Sizer) կարծում է, որ 5G ցանցերում «սարքերի կենդանաբանական այգի կլինի»։ Սմարթֆոններն ու պլանշետները չեն անհետանա։ Բայց, բացի դրանցից, ցանցում կհայտնվեն տեսահսկման խցիկներ, եղանակային ցուցիչներ, «խելացի» էլեկտրական ցանցերի ցուցիչներ, ավտոմեքենաներ և այլ բազմաթիվ նոր սարքեր։
Ինչ վերաբերում է տվյալների բջջային փոխանցման արագությանը, տեսականորեն 5G–ի առավելագույն ցուցանիշը կկազմի 10 ԳԲիթ/վրկ։ «Մեգաֆոնը» և Huawei–ն արդեն գործընկերներ են։ Այս տարվա սկզբին «Մեգաֆոնը» գործարկել է բջջային ինտերնետի մինչև 300 ՄԲիթ/վրկ արագությամբ LTE-Advanced առևտրային ցանցը` Huawei–ի արտադրած բաժանորդային սարքավորման և ցանցային ենթակառուցվածքի օգտագործմամբ։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:42 19.11.2014