Արհեստական ինտելեկտը գրել է համակարգչային խաղի առաջին սցենարը
ԵՐԵՎԱՆ, 3 սեպտեմբերի. /ԱՌԿԱ/. Ջորջիայի տեխնոլոգիական ինստիտուտում ստեղծված «Շահերեզադե» արհեստական ինտելեկտի համակարգը սովորել է գրել «տեքստային արկածների» ժանրին պատկանող համակարգչային խաղերի և ինտերակտիվ գեղարվեստական ստեղծագործությունների սցենարներ, հաղորդում է ՌԻԱ Նովոստին` հղում անելով համալսարանի մամուլի ծառայությանը։
Առաջին համակարգիչների հետ ստեղծված համակարգչային խաղերի ամենավաղ ժանրերից է այսպես կոչված «ինտերակտիվ պատմությունները» (interactive fiction), որոնք նման են արկածային կամ դետեկտիվ վեպերին, որոնք խաղացողն ինքն է կազմում` էկրանին ներկայացված մի քանի տարբերակներից ընտրելով կերպարների վարքագծի տարբերակներ։ Հաճախ նման ֆունկցիաները ներառված են այլ ժանրերի խաղերի մեջ, ինչպես նաև դրանք ներառում են տրամաբանական և մաթեմատիկական գլուխգործոցներ։
Ջորջիայի տեխնոլոգիական ինստիտուտի ծրագրավորները ստեղծել են արհեստական ինտելեկտի ինքնատիպ համակարգ, որը կարողանում է մշակել նման խաղերի շատ որակյալ սցենարներ, որոնք գրեթե չեն զիջում մարդկային մշակումներին` հենվելով այն հնարքների վրա, որոնք ծրագիրը «տեսել է» իր կամավոր օգնական–crowdsourcer–ներից։
Այս համակարգն աշխատում է հետևյալ կերպ. ծրագրավորողը ստեղծում է սկզբնական որոշակի սցենար, խաղացողի խնդիրներն ու խաղային աշխարհի մանրամասները, իսկ «Շահերեզադեն» (Ջորջիայի ինստիտուտի գիտնականներն այսպես են կոչել իրենց մշակումը) ընտրում է խաղացողի գործողությունների հնարավոր տարբերակներ` հենվելով ներկայացված պարամետրերի, գրող– crowdsourcer–երի փորձի և խաղացողի նախկին գործողությունների վրա։
Գիտնականների խոսքով` այս արհեստական ինտելեկտն, ըստ էության, չունի որևէ սահմանափակում, ինչպես շատ այլ նմանատիպ մշակումներ և կարող է աշխատել տարբեր տեսակի և բովանդակության պատմությունների և սցենարների հետ։ Ինչպես ցույց է տվել կամավորների մասնակցությամբ անցկացված փորձը, որոնք համաձայնել են «Շահերեզադեի» հետ խաղալ ինտերակտիվ խաղ, նրանցից ավելի քան 80 տոկոսը չեն հասկացել, որ գործ ունեն համակարգչի, այլ ոչ թե իսկական գրողի կողմից հորինված բանկի կողոպուտի, կինոթատրոնում ժամադրության կամ ուրիշ պատմության հետ։
Գիտնականներն այժմ աշխատում են արհեստական ինտելեկտի ճկունության ավելացման և նրա ստեղծարար հնարավորությունների ընդլայնման վրա։ Ծրագրավորողների խմբի ղեկավար Մարկ Ռիդլը (Mark Riedl) հուսով է, որ առաջիկայում համակարգչային «Շահերեզադեն» պատմություն պատմելու արվեստում կհասնի այնպիսի բարձունքների, որոնք վերագրում էին նրա հեքիաթային անվանակցին։ –0–
Ծանոթացեք լուրերին առաջինն ու քննարկեք դրանք մեր Telegram-ում
15:11 03.09.2015