Facebook-ը հեշտացրել է լուսանկարներ փոխանակելու գործառույթը

ԵՐԵՎԱՆ, 17 հունիսի. /ԱՌԿԱ/.  Facebook-ը գործարկել է Moments հավելվածը` սոցցանցից դուրս լուսանկարների հետ աշխատանքը շարունակելու համար։ Այդ մասին նշված է կորպորացիայի պաշտոնական բլոգում։ Հավելվածն առայժմ հասանելի է iOs–ի և Android–ի համար միայն ԱՄՆ–ի տարածքում, որտեղ օրենսդրությունը թույլ է տալիս, որ սոցիալական ցանցն օգտագործի լուսանկարների համար երաշխավորված նշումներ կատարելու տեխնոլոգիան, գրում է Lenta.ru–ն։

Moments–ի օգնությամբ օգտատերերը կարող են լուսանկարչական ալբոմներ կազմել  սմարթֆոնում կամ պլանշետում պահպանվող լուսանկարներից և հրապարակել դրանք ընկերների համար. այլևս կարիք չկա ալբոմը հրապարակել սոցցանցում։ Ուղարկված նկարները մնում են Facebook–ի սեփական ամպային պահոցում։ Ընկերներին լուսանկարներում նշելու հարցում կօգնի հավելվածում կիրառվող դեմքերի ճանաչման տեխնոլոգիան։

Տեխնոլոգիան մշակել է արհեստական բանականության ուսումնասիրությունների լաբորատորիայի թիմը։ Ճանաչման ալգորիթմը վերլուծում է ժապավենում առկա ընկերների լուսանկարները և համապատասխանություններ որոնում պատկերների հոսքում։ Եթե լուսանկարում նշված օգտատերը դեռ չունի այդ հավելվածը, նրան Messenger–ով ծանուցում կուղարկվի այն մասին, որ նրան նշել են լուսանկարում։ Նրան կառաջարկեն ներբեռնել Moments–ը լուսանկարը դիտելու համար։ Հավելվածը ստեղծողները հույս ունեն, որ Messenger–ի հետ սերտ կապի շնորհիվ հավելվածը շատ արագ ճանաչում ձեռք կբերի։

Արհեստական բանականության զարգացումը (վիրտուալ իրականության և ողջ աշխարհում ինտերնետ–միացման շարքում) Facebook–ի ռազմավարական ուղղությունն է, Business Insider հրատարակությունը մեջբերում է կորպորացիայի տեխնիկական տնօրեն Մայք Շրեպֆերի խոսքերը։ Facebook–ի արհեստական բանականության ուսումնասիրությունների երրորդ լաբորատորիան բացվել է Փարիզում հունիսի 2–ին։

Facebook–ը վաղուց է աշխատում դեմքերի ճանաչման տեխնոլոգիայի վրա։ Այդ գործառույթը մասամբ իրագործվեց, երբ սոցիալական ցանցը սկսեց օգտատերերին առաջարկել, որ լուսանկարներում նշեն ընկերներին։ 2011թ.–ին Էդինբուրգում կորպորացիայի եվրոպական կենտրոնակայանի դեմ հայց էր ներկայացվել քաղաքացիների գաղտնիության իրավունքները խախտելու համար, իսկ դատարանի որոշումը պահանջել էր փոխել Եվրամիության տարածքում սոցցանցի օգտատերերի անձնական տվյալների մշակման քաղաքականությունը։-0-

Ծանոթացեք լուրերին առաջինն ու քննարկեք դրանք մեր Telegram-ում

13:36 17.06.2015