Հայտնի են դարձել Windows 10–ի գները

ԵՐԵՎԱՆ, 1 հունիսի. /ԱՌԿԱ/. Newegg.com ինտերնետային խանութը հրապարակել է Windows 10–ի OEM տարբերակի գինը (որը նախատեսված է անհատական համակարգիչներ արտադրողների համար), հաղորդում է CNews–ը։

Ինչպես նշվում է խանութի կայքում, Windows 10 Home–ի արժեքը կազմում է 110 դոլար, իսկ Windows 10 Professional–ի գինը` 150 դոլար։ Դա 10 դոլարով շատ է Windows 8–ի OEM տարբերակի գնից, որը սահմանվել էր գործարկման պահին, նշում է ZDNet–ը։

Առաջին անգամ չէ, որ Newegg.com խանութը հրապարակում է Microsoft–ի նոր օպերացիոն համակարգի գները մինչև համակարգի պաշտոնական շնորհանդեսը։ 2012թ.–ին խանութը հրապարակել էր նաև Windows 8–ի գները։

Խանութը հրապարակել է նաև Windows 10–ի OEM տարբերակի թողարկման ամսաթիվը` 2015թ.–ի օգոստոսի 31։ Ինչպես նշում է ZDNet–ը, Windows–ի RTM և OEM տարբերակները թողարկվում են երեք ամսվա տարբերությամբ։ Հայտնի է, որ Windows 10–ը պաշտոնապես կթողարկվի հուլիսին։ Այսպիսով, այս անգամ Microsoft–ը, ամենայն հավանականությամբ, կրճատել է երկու տարբերակների գործարկման ժամանակահատվածը, նշում է հրատարակությունը։

Microsoft–ը կթողարկի Windows 10–ը յոթ տարբերակով։ Windows 10 Enterprise–ը` խոշոր ձեռնարկությունների համար, և Windows 10 Education–ը` կրթական հաստատությունների համար։

Բոլոր տարբերակներում կգործի Microsoft Edge նոր բրաուզերը, Cortana ձայնային օգնականը։ Կգործի նաև Windows Hello դեմքի ճանաչման և աչքի ծիածանաթաղանթի  սկանավորման համակարգը, ինչպես նաև Photos, Maps, Mail, Calendar, Music, Video հավելվածները։

Windows 10 Pro–ն համալրված կլինի Windows 10 Home–ի բոլոր հնարավորություններով և տվյալների կառավարման ընդլայնված գործառույթով, ինչպես նաև` սարքերի հեռակառավարման հնարավորությամբ։ Այս բոլոր գործառույթները կարող են օգտագործվել փոքր բիզնեսի դեպքում։

Windows 10–ը կարող են անվճար տեղադրել Windows 7 և 8 արտոնագրված կրկնօրինակների մասնավոր սեփականատերերը։ Նրանք չեն վճարի նոր համակարգի համար, կստանան համակարգի բոլոր թարմացումները։ Սկզբում նախատեսվում էր, որ այդ հնարավորությունից կարող են օգտվել նաև Windows–ի ոչ արտոնագրված տարբերակների օգտատերերը, սակայն Microsoft–ը հերքել է այդ տեղեկությունը։ –0–

Ծանոթացեք լուրերին առաջինն ու քննարկեք դրանք մեր Telegram-ում

15:24 01.06.2015