Հաստատված է` WhatsApp–ն ակտիվորեն վեբ–տարբերակ է մշակում

ԵՐԵՎԱՆ, 21 հունվարի. /ԱՌԿԱ/. Համացանցում հայտնվել են Android–ի համար WhatsApp բջջային հավելվածի սքրինշոթերը, որոնք վկայում են մեսենջերի վեբ–տարբերակի ակտիվ մշակման մասին։ Google+ սոցցանցի իր էջում այդ սքրինշոթերը հրապարակել է Իվան Ալվարես (Ivan Alvarez) անունով օգտատերը, հաղորդում է Cnews.ru–ն։

Սքրինշոթերի վրա պատկերված է բրաուզերի և վստահելի համակարգչի հետ մեսենջերի փոխկապակցման կարգավորումը` պաշտպանված միացում ապահովելու համար։ Սքրինշոթերում ոչ մի ավել տեղեկատվություն չկա։

2014 թ.–ի դեկտեմբերի սկզբին հայտնի դարձավ, որ WhatsApp–ը նախատեսում է վեբ–ինտերֆեյս ստեղծել մեսենջերում շփման համար։ Այդ ժամանակ TechCrunch հրատարակությանը տված հարցազրույցում Telegram start-up–ի ղեկավար և «ВКонтакте» սոցցանցի հիմնադիր Պավել Դուրովը տեղեկացրեց, որ WhatsApp ընկերությունը փորձել է ներգրավել իր աշխատակիցներից մեկին` հավելվածի վեբ–տարբերակի վրա աշխատելու համար։

Հավելենք, որ WhatsApp–ն ընդհանուր առմամբ հետ է մնում իր մրցակիցներից պլատֆորմների քանակով, որոնց վրա այն գործում է։ Օրինակ Telegram բջջային հավելվածից բացի, այս նախագիծն ունի վեբ–տարբերակ և հավելված անհատական համակարգիչների համար։ Դրանց միջև բոլոր հաղորդակցությունները սինքրոնացվում են։ Apple iMessage–ը գործում է նաև շարժական և ոչ շարժական տեսքով, նույնը վերաբերում է նաև Viber–ին։

Այնուամենայնիվ, WhatsApp–ը օգտատերերի ամենախոշոր բազան ունեցող մեսենջերն է` ավելի քան 600 մլն բաժանորդ։ 2013 թ.–ին աշխարհի խոշորագույն Facebook սոցցանցը հայտարարել է ռեկորդային 19 մլրդ դոլարով WhatsApp–ը ձեռք բերելու մտադրության մասին։ Գործարքը փակվել է հոկտեմբերի սկզբին։–0–

Ծանոթացեք լուրերին առաջինն ու քննարկեք դրանք մեր Telegram-ում

15:21 21.01.2015