ՀԱՅԱՍՏԱՆԻ ՏԵՂԵԿԱՏՎԱԿԱՆ ՏԵԽՆՈԼՈԳԻԱՆԵՐԻ ՈԼՈՐՏՈՒՄ ԱՃԻ ՄԻՏՈՒՄՆԵՐ ԵՆ ՆԿԱՏՎՈՒՄ. EIF
ԵՐԵՎԱՆ, 8 սեպտեմբերի. /ԱՌԿԱ/. Հայաստանի տեղեկատվական տեխնոլոգիաների ոլորտում աճի միտումներ են նկատվում, նախօրեին լրագրողներին ասել է Ձեռնարկությունների ինկուբատոր հիմնադրամի (EIF) տնօրեն Բագրատ Ենգիբարյանը:
Նրա խոսքերով` այս պահի դրությամբ վերլուծվում և ուսումնասիրվում են այն ոլորտները, որոնք կներկայացվեն մի քանի ամսից, սակայն արդեն այսօր կարելի է նշել, որ չնայած անկումներին և վերելքներին՝ ՏՏ-ոլորտում, ընդհանուր առմամբ, աճի միտումներ են գրանցվում:
Նա նշել է, որ 2009 թ.-ի վերջին նորաստեղծ ընկերությունների թիվը կգերազանցի 2008 թ.-ի ցուցանիշները, որը բավականին բարենպաստ էր ՏՏ-ոլորտի համար:
«Չնայած, որ եկամուտների ընդհանուր ծավալի տեսակետից կարող է կրճատում գրանցվել՝ հատկապես հաշվի առնելով դրամի և դոլարի հարաբերակցության փոփոխությունը, այնումենայնիվ, հարկ է նշել, որ Հայաստանի այդ շուկա դուրս գալու ոգևորությունը շարունակում է մնալ բարձր մակարդակի վրա և հետաքրքրություն ներկայացնել, ինչը թույլ կտա տարվա արդյունքներով աճ գրանցել», - ասել է Ենգիբարյանը:
Նրա խոսքերով՝ մեկ այլ միտումն այն է, որ ճնգաժամի արդյունքում վերաձևավորված ընկերություններից ստեղծվել են նորերը, իսկ գրեթե բոլոր աշխատակիցները տեղավորվել են աշխատանքի:
Ոլորտի թերությունների թվում նա նշեց տեխնիկական ոլորտում տեղ գտած խնդիրները, մասնավորապես, ինժեներական մշակումների հատվածում, որտեղ կրճատման միտումներ են նկատվում՝ չնայած ՏՏ-ոլորտի ընդհանուր աճին:
«Վերլուծությունը ցույց է տալիս, որ այս հարցում շատ կարևոր է համակարգային և համալիր մոտեցումը, մասնավորապես, ՏՏ զարգացման ռազմավարության առկայությունը, պետությունների մոտեցումները, զարգացման միությունների և գործակալությունների առկայությունը, ինչը զարգացման լուրջ ազդակ է, որը մենք փորձում ենք կիրառել նաև այլ ոլորտներում, մասնավորապես, ինժեներական և 3D-մոդելավորման ոլորտներում», - ասել է Ենգիբարյանը:
Տեղեկատվական տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանն իր հերթին նշել է, որ Հայաստանի վրա ճգնաժամի ազդեցությունը զգացվում է, սակայն «Հայաստանում ՏՏ-ոլորտի վրա աղետալի ազդեցություն մենք այդպես էլ չտեսանք»:
«Դա կարելի է բացատրել ճգնաժամից ավելի շատ տուժած օտարերկրյա ընկերություններից հայ մշակողների ազդեցության ցածր մակարդակով կամ այնպիսի ոլորտների հետ համագործակցությամբ, որոնք շատ չեն տուժել ճգնաժամից», - ասել է Վարդանյանը:-0-
Ծանոթացեք լուրերին առաջինն ու քննարկեք դրանք մեր Telegram-ում
23:40 08.09.2009