Մեծածախ ինտերնետի սակագների իջեցումը կարող է հանգեցնել դրա դեֆիցիտին Հայաստանում. ԱրմենՏելի գլխավոր տնօրեն
ԵՐԵՎԱՆ, 9 դեկտեմբերի. /ԱՌԿԱ/. Հայաստանի հանրային ծառայությունները կարգավորող հանձնաժողովի որոշումը` մեծածախ ինտերնետի բարձր գներն իջեցնելու վերաբերյալ, կարող է հանգեցնել շուկայում դրա դեֆիցիտին, երեքշաբթի հայտարարեց «ԱրմենՏել» ՓԲԸ գլխավոր տնօրեն Իգոր Կլիմկոն: Հայաստանի հանրային ծառայությունները կարգավորող հանձնաժողովը նոյեմբերի 18-ի որոշման համաձայն` մեծածախ ինտերնետի առավելագույն սակագինը կկազմի ամսական 174 հազար դրամ 1 Մբիթ/վայրկյան արագության դեպքում, ինչը կրկնակի պակաս է 2009 թ.-ի առաջին կիսամյակում գործող սակագնից: Նման որոման արդյունքում փրովայդերների եկամտաբերությունը կնվազնի մինչև 12 տոկոս` նախկին 55 տոկոսի փոխարեն: Հանձնաժողովում նման մոտեցումը մեկնաբանում են նրանով, որ կարգավորիչի գործառույթն է, որպեսզի թույլ չտա ընկերություններին գերշահույթ ստանալ սպառողների հաշվին: «ՀԾԿՀ այս որոշումը կարող է հանգեցնել այն բանին, որ օպերատորներին շահավետ չի դառնա ներդրումներ կատարել կապի նոր մայրուղային ուղիներում, ինչը անխուսափելիորեն կարող է շուկայում մեծածախ ինտերնետի դեֆիցիտի հանգեցնել»,- ասաց Կլիմկոն: Նա նշեց, որ առկա սակագները ծածկում են «ԱրմենՏելի» ընթացիկ ծախսերը: Սակայն, գլխավոր տնօրենի խոսքերով, գիտատեխնիկական առաջընթացի բարձր տեմպերի պայմաններում հեռահաղորդակցական ոլորտի համար կարևոր է նախագծերի արագ փոխհատուցելիությունն ու նորացումը, ինչը բխում է ոլորտում սարքավորումների արագ բարոյական մաշվածությունից: «Հանձնաժողովն իր որոշումն ընդունելիս հաշվի չի առել բոլոր ասպեկտներն ու մեծածախ ինտերնետ մատակարարողների շահերը»,- ասել է Կլիմկոն: Հայաստանում այսօրվա դրությամբ գործում է մեծածախ ինտերնետի երկու օպերատոր: Առաջինը «ԱրմենՏել» (ապրանքանիշը՝ Beeline) հեռահաղորդակցական ընկերությունն է, իսկ երկրորդը՝ FiberNet Communications-ը: Հոկտեմբերի 15-ից հայկական շուկա է մտել մեծածախ ինտերնետի ևս մեկ փրովայդեր՝ GNC Alfa ընկերությունը:-0-
Ծանոթացեք լուրերին առաջինն ու քննարկեք դրանք մեր Telegram-ում
19:58 09.12.2009