ՀԱՅԱՍՏԱՆԻ ՄԵԾԱԾԱԽ ԻՆՏԵՐՆԵՏԻ ՕՊԵՐԱՏՈՐՆԵՐԸ ԿԱՐՈՂ ԵՆ ԻՋԵՑՆԵԼ ԳՆԵՐԸ 40-50%-ՈՎ, ԻՆՉԸ ԿՀԱՆԳԵՑՆԻ ՊՐՈՎԱՅԴԵՐՆԵՐԻ ՄԱՆՐԱԾԱԽ ԾԱՌԱՅՈՒԹՅՈՒՆՆԵՐԻ 30-40 % ԳՆԱՆԿՄԱՆ. UI

ԵՐԵՎԱՆ, 15 հունվարի. /ԱՌԿԱ/. Մեծածախ ինտերնետի օպերատորները Հայաստանում կարող են իջեցնել գները 40-50 տոկոսով, ինչը կհանգեցնի պրովայդերների մանրածախ ծառայությունների 30-40 տոկոս գնանկման, «ԱՌԿԱ» գործակալությանը տված հարցազրույցում հայտարարեց Տեղեկատվական տեխնոլոգիաների ընկերությունների միության (UITE) գործադիր տնօրեն Կարեն Վարդանյանը։

Ըստ նրա՝ այս ցուցանիշներին հասնելու միակ հնարավոր տարբերակը առկա ռեսուրսների օգտագործումն է և ոչ թե նորերի ստեղծումը։
«Ներկայում մենք ունենք օպտիկամանրաթելային հսկայական ռեսուրսներ, որոնք լիովին չեն օգտագործվում մեծածախ ինտերնետի օպերատորների՝ «ԱրմենՏելի»,  FiberNet Communications-ի կողմից»,- ասաց Վարդանյանը։

Այլ խնդիր է, ըստ նրա, գնագոյացումը, որտեղ ճիշտ մեթոդաբանության կիրառումը և պրովայդերի բոլոր ծախսերի բացառումը սպառողի սակագնից թույլ կտա զգալիորեն կրճատել սակագները։

Եվս մեկ խնդիր է, ինչպես կարծում է Միության գործադիր տնօրենը, երկրում առկա ռեսուրսների, մասնավորապես, շենքերի, մայրուղիների, ջրհորների արդյունավետ օգտագործման բարձրացումը։

Նա նշեց նաև «վերջին մղոնի» ազատականացման անհրաժեշտությունն, ընդգծելով, որ խոսքն այն մասին չէ, որ բոլոր օպերատորները պետք է օգտվեն «ԱրմենՏելի» ունեցած ռեսուրսներից, այլ հակառակը, «ԱրմենՏելը» նույնպես պետք է կարողանա օգտվել այլ օպերատորների ռեսուրսներից՝ «բոլոր ռեսուրսները բոլորի համար» սկզբունքով, որն ընկած է «Հեռահաղորդակցությունների մասին» օրենքի հիմքում։

«Միաժամանակ օպերատորները պետք է ներկայացնեն ռեսուրսների օգտագործման եռամյա ծրագիր, որը պետք է բաղկացած լինի ամենամսյա հստակ նախագիծ-ժամանակացույցից, որից շեղվելը կարող է հանգեցնել տվյալ ռեսուրսի օգտագործման լիցենզիայից զրկվելուն»,- ասաց Վարդանյանը։

Ըստ նրա՝ պակաս կարևոր չէ նաև տեղական կոնտենտի առկայության դերը, որն ամբողջովին պետք է փոխի իրավիճակը, և տվյալ հարցում կարևոր տարրեր են e-government ծրագրերը, որոնք կառավարությունը մտադիր է իրագործել։

«Գների լուրջ կրճատման պետք է հանգեցնի ոչ թե նոր օպերատորի մուտքը շուկա, այլ համապատասխան սպառողի ճնշումը և Հանրային ծառայությունները կարգավորող հանձնաժողովի գործողությունները, որոնք Հայաստան մտնող ինտերնետի գնագոյացման հարցերի ճիշտ լուծման դեպքում կարող են հանգեցնել շուկայում սակագների զգալի նվազմանը»,- ասաց Վարդանյանը։
 
Հայաստանի հանրային ծառայությունները կարգավորող հանձնաժողովի 2009թ. նոյեմբերի 18-ի որոշմամբ երկրում սահմանվել է ԱրմենՏել և FiberNet Communications ընկերությունների կողմից մատակարարվող մեծածախ ինտերնետի առավելագույն սակագնի չափը, որի առավելագույն սակագինը կկազմի ամսական 174 հազար դրամ 1 Մբիթ/վայրկյան արագության դեպքում, ինչը կրկնակի պակաս է 2009 թ.-ի առաջին կիսամյակում գործող սակագներից:

Մինչ այդ գոյություն ունեցող սակագների պարագայում փրովայդերների եկամտաբերությունը կազմել է 55 տոկոս, իսկ  որոշման ընդունումից հետո եկամտաբերության մակարդակը կնվազնի մինչև 12 տոկոս:

Հայաստանում այսօրվա դրությամբ գործում է մեծածախ ինտերնետի երկու օպերատոր: Առաջինը «ԱրմենՏել» (ապրանքանիշը՝ Beeline) հեռահաղորդակցական ընկերությունն է, իսկ երկրորդը՝ FiberNet Communications-ը: Հոկտեմբերի 15-ից հայկական շուկա է մտել մեծածախ ինտերնետի ևս մեկ փրովայդեր՝ GNC Alfa ընկերությունը:-0-

Ծանոթացեք լուրերին առաջինն ու քննարկեք դրանք մեր Telegram-ում

19:54 15.01.2010