ArCa վճարային համակարգը 2010 թ.-ին կսկսի ԱրմենՏել և VivaCell-MTS բջջային օպերատորների վճարումների ընդունումը
ԵՐԵՎԱՆ, 2 փետրվարի. /ԱՌԿԱ/. «Արմենիան Քարդ» (Armenian Card - ArCa) հայկական վճարային համակարգը 2010 թ.-ին կսկսվի ԱրմենՏել և VivaCell-MTS բջջային օպերատորների ուղղակի վճարումների ընդունումը: Այս մասին «ԱՌԿԱ» գործակալությանը տված հարցազրույցում ասաց ArCa-ի գործադիր տնօրեն Շահեն Հովհաննիսյանը:
Նրա խոսքերով՝ վճարային համակարգը 2009 թ.-ին տեխնիկապես վերազինվել է և սկսել է բանկոմատների կառավարման նոր ծրագրի գործարկումը, որն ավելի լայն հնարավորություններ է տրամադրում:
Նա նշեց, որ նոր համակարգը թույլ է տալիս կուտակել բոլոր կոմունալ վճարումները, այն նաև պարունակում է որոշ բանկային ֆունկցիաներ, որոնք իրականացնում են բանկոմատները, մասնավորապես՝ կարճաժամկետ վարկերի մարման ֆունկցիաները, ինչը կտրուկ կբարձրացնի սպասարկման որակը:
«Նոր համակարգի շնորհիվ՝ արդեն 2009 թ.-ի դեկտեմբերից մենք բանկոմատների միջոցով իրականացնում ենք բջջային օպերատորների ուղղակի վճարումներ: Այս ծառայությունները դեռ տրամադրվում են միայն Orange Armenia բջջային օպերատորի համար, սակայն արդեն մոտ օրերս նմանատիպ աշխատանքները կավարտվեն նաև բջջային կապերի այլ օպերատորների՝ ԱրմենՏելի և VivaCell-MTS-ի համար», - ասաց Հովհաննիսյանը:
Նա նշեց, որ դա ծառայությունների նոր ձև է, որը թույլ է տալիս բաժանորդին լիցքավորել հեռախոսային հաշիվը վճարումը կատարելուց անմիջապես հետո՝ առանց կտրոնի ստացման և այն հեռախոս մուտքագրելու անհրաժեշտության:
Միաժամանակ, նրա խոսքերով, նոր համակարգի առանձնահատկությունն այն է, որ հաշիվը կարելի է վերալիցքավորել ցանկացած գումարի, այլ ոչ թե ֆիքսված գումարի չափով, ինչպես վերալիցքավորման քարտերի միջոցով հաշիվը լիցքավորելու դեպքում:
«Այսօր այս ծառայությունը հասանելի է ոչ միայն համակարգի բանկոմատների, այլև ArCa համակարգի պորտալի միջոցով», - ասաց Հովհաննիսյանը:
Հայաստանում գործում է բջջային կապի երեք օպերատոր՝ «ԱրմենՏել», VivaCell-MTS և Orange Armenia:
2010 թ.-ի հունվարի 1-ի տվյալներով՝ ArCa համակարգում գործում է շուրջ 580 բանկոմատ: Միաժամանակ համակարգի հնարավորությունները թույլ են տալիս ընդլայնել այդ թիվը մինչև երեք հազարի:
«Արմենիան Քարդ» ՓԲԸ-ն հիմնադրվել է 2000 թ.-ի մարտի 16-ին, այսօրվա դրությամբ նրա անդամներն են երկրի 22 առևտրային բանկերից 20-ը:
«Արմենիան Քարդի» անդամ-բանկերն այժմ գործարկում են ArCa Classic, ArCa Gold, ArCa Business, ArCa Affinity, ArCa Co-branded, ArCa Debit և ArCa Platinum քարտերը:
Ընկերությունը նաև MasterCard Europe միջազգային վճարային համակարգի լիիրավ անդամ է և իրականացնում է VISA (Third Party Processor) համակարգի քարտերի պրոցեսինգ (1 դոլարը 376,03 դրամ է):-0-
Ծանոթացեք լուրերին առաջինն ու քննարկեք դրանք մեր Telegram-ում
21:56 02.02.2010